New Era Newspaper

MTC Shares
Icon Collap
...
Home / Uuministeli wuunamapya onkene tawu tsikile okulongela aanafalama uuwanawa

Uuministeli wuunamapya onkene tawu tsikile okulongela aanafalama uuwanawa

2021-09-15  Victoria Kaapanda

Uuministeli wuunamapya onkene tawu tsikile okulongela aanafalama uuwanawa
Top of a Page

Uuministeli wuunamapya, omeya netopolo lyevi owa pititha kutya aanafalama ye li 40 000 ohaya dhewulwa omumvo kehe, nelalakano lyokuhumitha komeho nokuhwahwameka onkalo yiikulya moshilongo.

Omupopiliko muuministeli wuunamapya Jona Musheko okwa ti, oye na oosenda dhi li 144 miitopolwa ayihe 14 moshilongo mpoka aanafalama ya kumagidhwa ya pewe omadhewulo miimpungu yuunafalama ya yooloka.

Musheko ndhoka okwe dhi popi esiku a li taga gandja omayele oshowo ta kumagidha aanafaalama nkene ye na okuhuma komeho nokuyanda uupyakadhi koSamora Machel Youth Forum ndyoka ya ningile oshigongiilonga shawo oshiwike sha zi ko moWindhoek.

“Uuministeli natango owu li metifa okuya po noprogalama yoku eta po iikulya okupitila miikunino yiikwamboga tayi ithanwa Dry Land Crop Production Program (DCPP),” ta popi ngaaka.

Ta ti, oprogalama ndjoka otayi ka totwa ashike miitopolwa omulongo ngaashi, Zambezi, Kavango yokuuninginino, Kavango gwokuuzilo, Omusati, Ohangwena, Oshikoto, Oshana, Kunene, Otjozondjupa oshowo Omaheke.

Musheko ta ti, sigo onena aanafalama ye li 40 000 ohaya kwathelwa kehe komumvo nomayakulo ngaashi okupululilwa, okukuna, okulima oshowo okukwathelwa noombuto dhongushu.

“Etompelo lyoprogalama ndjoka DCPP okukwashilipaleka kutya eyambidhidho tali gandjwa kuuministeli wuunamapya otali kwathele, unene mokukandula po ondjala oshowo okugandja iilonga mokati kaanyasha. Oshowo oku indjipaleka iikulya mokati koshigwana shoka kasha na iiyemo,” ta fatulula ngaaka.

Natango okwa fatulula wo kutya etompelo limwe lyopologalama ndjoka olyokuxwaxwameka eyindjipalo lyiikulya miitopolwa moka showo okudhewula omavi ga kale ge li monkalo ombwaanawa yokumena iikwamboga.

“Okupitila natango oprogalama ndjika aanafaalama ye vule 5 000 ya za kiitopolwa ya yooloka, oya dhewulwa, ihe nena oyo taya iyithana aanafalama mboka ye shi pondola okupitila miikunino yawo,” ta ti ngaaka.

Musheko okwa gwedha po wo kutya aanafaalama yiimuna nayo otaya etelwa opoloyeka tayi ithanwa “Small Stock Distrubition and Development, ndjoka tayi ka gandja iikombo  komagumbo 20, ngoka taga hogololwa kwa talika konkalo, tashi ka ningwa kehe moshitopolwa.

Ta ti, shoka otashi ka kwathela oshigwana oshowo kehe ngoka ta ka ninga omunelago okumona oompito ndhoka okulundulula oshowo okuyambula po onkalo ye li muyo, oshowo okukandula po oluhepo nondjala.

Omunashipundi gwoSamora Machel Youth Forum ,Isdor Aluteni, esiku ndyoka okwa li a fatulula kutya oshigongikumagidho shoka osha li sha ningwa oshoka okwa li kwa ndhindhilikwa kutya uunafalama owo tawu vulu okukutha aanyasha momapandaanda.

Ta ti, esiku ndyoka okwa li ya mono ompito yokwiilonga oshindji kombinga yuunamapya  na nkene ye na okulonga, okuhuma komeho oshowo mpoka ye na okulundulula.

“Oyendji oya tseya kutya kehe gumwe ota vulu okuninga omunafaalama, kape na nando eimbo lyasha,” ta ti ngaaka.


2021-09-15  Victoria Kaapanda

Share on social media
Bottom of a page