Omupeviminista guunamapya, omeya nomakuti Anna Shiweda okwa ti, uunamapya owo onakuyiwa oshoka ihau felefa.

‘’Sigo esiku lyetu lya hugunina, otuna okulya. Iikulya oyindji ohayi zi muunafalama ngaashi iikwamboga no sho tuu,’’ ta popi ngaaka.

Ta kumagidha aanyasha ta ti, naya longithe ompito ndjika okukutha ombinga muunafalama, oshoka oshindji otashi holoka, shoka tashi ka lundulula onkalo yoshilongo shika.

Shiweda okwa li ta popi ngaaka esiku kwa li ta patulula omauliko giipindi yuunafalama mOshikuku ngoka gali ga ningilwa pehala tali ithanwa Oshikuku town lodge.

‘’Okwa kwashilipalekwa kutya oopelesenta 80% ndhiikulya ohayi etwapo, okupitila maanafalama aashona,” ta ti ngaaka.

Ta ti okwa ndhindhilikwa kutya aanafalama oyendji taya ndhana onkandangala aakiintu, sho shoka uutokonoloque tau longithwa opo aakintu ya ningilwe iilonga iipu.

Minista esiku ndyoka okwa li eende  momauliko giipindi moka ta tala noku gandja omukumo kaauliki yiipindi yuunafalaama ya yooloka.

Omukwateli komeho gwomauliko giipindi Parastus Nepolo okwa ti omauliko giipindi ngoka oga tameke momasiku 29 Sepetemba no ga li ga hulu momasiku 01 lyOkotomba nuumvo.

‘’Omauliko giipindi ngaka oga li ga yooloka komakwawo agehe ga holoka oshoka ngaka oga li ge na iinyangadhalwa ya yooloka,” ta fatulula ngaaka. 

Nepolo ta ti, aanafaalama ayehe oya li ya hiywa opo kwali ya longithe ompito ndjoka okuya okumona ontseyo ya gwedhwa po kombinga yuunafaalama. 

‘’Otwa li tuna natango omauliko giinima yOshiwambo, okuza kiikulya ayihe, iikunwa oshowo iizalomwa,’’ ta popi ngaaka. 

Ta gwedha po kutya shoka oye shi ningi okukaleka po nokusimaneka wo omuthigululwakalo gOshiwambo.

Omahala ngoka ohaga udha unene aanyasha, mboka ye na okutseya ashihe kombinga yOshiwambo opo wo ya vule okutaandelekitha omuthigululwakalo koshigwana shokomongula, opo omuthigulwakalo kaagu se po.

Oshigwana osha pumbwa okutseya kutya oomuthigululwakalo ogo omulilo goshilongo nogwa pumbwa okusimanekwa opo gu kalekwe po.

“Aanafaalama okwa li ya pewa omadheulo nkene ye na okukwatela po iikunino yawo ,iimuna yawo oshowo okutseya nkene okuya po noompito ndhimwe ndhiili ndhuunafalama” ta ti ngaaka.

Nepolo okwa ti, aanafaalama okwa li ya longwa oshindji okupitila momadhewo moka, no kwali ya pewa  oonzapo ndhawo, Olyomakaya” ta  ti ngaaka.

Ta ti, okwa li a totha mo aanafaalama ye li yatano mboka kwali ya mona omandheulo oshali, mboka ye shiwike nawa momudhingoloko gwOshikuku.

Ta ti, okwa li wo kwa gandjwa omapapa gomushingithi dhingi, ngoka a li a hogololwa okupitila muuyogoki, mokuteleka dhingi niikwawo oyindji.

Nepolo okwa ti, okwa li natango ku na iinyangadhalwa ya yooloka, oshowo omayinyanyudho.

Omunafalama gumwe ngoka ha landitha omakunde goshiwambo, okwa li a popi esiku lyeegululo pambelwa kutya, omauliko giipindi ngoka ogeya longo oshindji.

‘’Okuza nena otuna ontseyo shoka tuna okuninga nashooka katuna okuninga momapya getu, miikunino yetu oshowo koofalama ndhetu,’’ ta ti ngaaka.

Omugandji gomauyelele melelo lyondoolopa lyaShikuku John Siloiso okwa ti, iinyangandhala yolundhi ndoka oya pumbiwa mondoolopa, oshoka ohayi hili aantu oyendji ya thike mondoolopa yawo.

“Ngoka omukalo goku humitha eliko mondoolopa yetu, ngaashi mushiwete kutya omainyengo nena ogendji mondoolopa, anangeshefa otaya longo,” ta ti ngaaka.

Okwa ti ngaashi sha tseyika nawa kutya egwopevi lyoshimaliwa olya guma oyendji, omawuliko giipindi otaga kwathele oku eta po oshimaliwa mondoolopa nokugandja oompito dhiilonga koyendji.

“Ngele mondoolopa omu na oompito dhiilonga oyindji, nena naakwashigwana itaya zi mo mondoolopa okukonga iilonga koondoolopa dhokokule”, ta ti ngaaka. 

Ta gwedha po ta ti ngele ehumokomeho tali etwa moondoolopa, nomuthigululwakalo nagu humithwe komeho nokusimanekwa opo kaagu dhimbiwe go gu kalekwe po.