Sho iilonga yuukolokoshi gwomakwato koonkondo tayi lulu moNamibia, omulumentu gwomimvo 40, omunandhololongo, naye okwa ningi wo oshihakanwa shiikulumuna yopaihulo sho anuwa a kwatelwa koonkondo mondholongo yezulonkalo yedhina Evaristus Shikongo Correctional Facility mOshikoto.

Shika oshimwe shomauyelele gena sha niimbuluma gapitithwa komukuluntu koshikondo shokugandja uuyelele moshigwana, Deputy Commissioner Kauna Shikwambi petameko lyoshiwike shika. 
Ta ti oshiningwanima shika osha ningwa nuumvo mesiku inaali ndhindilikwa sho omulumentu ngoka e li omukwashigwana gwaAngola a hulwa noku yiwa naye miihulo kaashi li pahalo lye, omanga a li e li moomposi. Omulumentu nguka a ningi oshihakanwa shoshimbuluma shika tashi koko moNamibia, okwa li a falwa koshipangelo hoka a ka ningilwa omakonaakono gopaunamiti. Omakonaakono gopolisi moshinima muka onkene taga tsikile.
–Nampa