Omukwatakanifi womauyelele wongeleka yaELCIN Thomas Uushona okwa ti ovaholafani nava kale tava shivifile ovakulunhu vavo tete manga inava kufa etokolo lokuhombolafana.
Uushona ou e li yoo vali hamushanga woshifo shOmukwetu, okwa ti osha fimana ngeenge ovaholafani tava shivifile ovakulunhu vavo kombinga yovavalekwa vavo opo ku kale kwa ningwa omakonakono kombinga yomukainhu ile omulumenhu oo ngeenge oku na tuu oukwatya uwa.
Okwa hokolola ta ti ovanhu vamwe ohava kala va dja momapata a nyika oshiponga ile hava kala ve na eendjokonona da kaka yokulonga oimbuluma.
Onghee okwa ti kasha li mondjila ngeenge omudali ta pitike omona a hombolwe komukolokoshi shaashi eshi otashi dulu okuteya po ohombo yavo diva ile tashi xwaxwameke omahepeko oukashikekookanhu momaumbo.
Pefimbo a ninga eenghundafana naKundna Etivali Uushona okwa kunghilila oshiwana opo shi kale sha fimaneka omufyuululwakalo ou wa kala hau longifwa nale ngeenge omukainhu ile omulumenhu e uya okushivika.
“Ovakulunhu nava kwashipaleke kutya ova ninga omakonakono e lixwa po kombinga yoshitenya shavo manga inave shi tambula ko. Onghee osha fimana opo ovakwapata va kale ve shi kutya omunhu ou ta hombolwa meumbo lavo oku na oukwatya u li ngahelipi, navali kutya okwa dile peni,” Uushona ta ti.
Okwa ti efimbo lonale oitenya okwa li hai shunifwa ko ngeenge inai pandika molwaashi kwa ningwa omakonakono kutya oshitenya oshi li ngahelipi.
Okwa ti naashi otashi kelele opo ovakulunhu vaha pitike ounona wavo vaha hombolwe kovanhu hava longo oilonga youxwapindi noshoyo vehe na omaukwatya mawa.
Uushona okwa ti ovaholafani nava kale tava yandje efimbo la wana kovakulunhu vavo opo va ninge omakonakono ngeenge ova panda tuu oshitenya osho ile ahawe.
“Ovaholafani vamwe ove hole okulinoma kutya ove na oilonga iwa opo vati a itavelwe diva ashike konima ngeenge ova hombola ohava kala tava tanguna shaashi mboli umwe ke na oilonga shili,” Uushona ta yelifile Kundana.
Okwa weda po ta ti ope na oitenya imwe ya shivika nawa moshiwana kutya oya longa oilonga youxwapindi ngaashi oumbudi, okukufa mo omateelelo, okulongifa nai okolwifa nosho tuu.