Festus Hamalwa

Kansela woshikandjohoololo shaNgwediva Andreas Uutoni okwa yandja oikulya keumbo la ninga omafiku tali pi komundilo uhe shivike opo tau di.

Kansela okwa talela po eumbo eli li li momukunda Ohambungu, moshitukulwa shaShana nokwa pa ovaneumbo ava oukutu voufila, oshivelelwa noipumbiwa ikwao yomeumbo.

Okwa didilikwa eumbo laPliskilla Kanime la kala nokupya oule womwedi paife, ashike ovanhu kave shi kutya omundilo owa dja peni, vati ohava mono ashike oinima mwa kwatela eenduda, ya tema nale.

Omundilo tete owa tameka momafiku 08 Juli eshi kwa li wa xwika po onduda imwe yokepata, eshi omafiku a ninga 29 Juli natango omundilo owa tameka omo wa xwika po onduda imwe yomutala womumati womeumbo. Omafiku 30 Juli omundilo owa mwena po manga fiyo omafiku O2 Aguste, omafiku 03 Anguste omundilo owa tameka natango potundi 11h00, omo wa tameka okuxwika onduda ya mwene weumbo yokunangala omo mwa pila oinima yaye aishe.

Otaku hokololwa kutya meumbo omo omu na omuti womudile oku ovanhu hava kufa  omafo okulitwimikila, ashike ovaneumbo ova limbililwa komuti ou shaashi ohau  kala ashike tau di omeva e na etutu efimbo keshe. Onghee eshi osha eta ovanhu opo va kale tave lipula kutya pamwe omuti ou ou na epuko.

 Pefimbo Uutoni a talela po eumbo eli okwa popya ta ti natango onghee ngaa eumbo laKanime tali twikile nokukala tali pi, omo paife eenduda adishe domeumbo da pya po, mwa kwatelwa omidjalo dofikola dovanafikola vomeumbo omo.

Mopaife ngaha ovaneumbo ohava nangala ashike pondje shaashi eenduda adishe oda pya po, nonande meumbo mwa xupa ngaa onduda imwe yokangulu ihave i longifa vali shaashi ova tila pamwe nayo i pye.

Uutoni okwa ti omundilo otau limbilike unene, onghee omakonaakono otaa twikile kutya oshike mbela tashi etifa omundilo ou shaashi natango kape na ouyelele kombinga yosheetifi shomundilo.