Kansela gwoshikandjohogololo shUuvudhiya Timoteus Shivute okwa koleke kutya oshitopolwa otashi ka mona omakwatathano gwopangodhi omwedhi nguka.
Shivute okwa ti, etenda lyomakwatathano olya tulwa po nale, niilonga oyili metifa opo li kale lya pwa.
“Etenda lyomakwatathano gwomakuthikuthi gopangondhi ota li ka tulwa po kehangano ndjoka hali andjakaneke omakwatahano moshilongo lyo MTC,” ta ti ngaaka.
Ta ti etenda ndyoka otali ka yambidhidha woo aakalimo yomo katyali poompito odhindji.
“Oyendji yeli kiitopolwa yokokule ohaya kala yahala okukwatathana naakwanezimo ya wo, ihe osha kala uupyakadhi okuya mona omolwa omakuthikuthi ngoka ga ka la taga nyangwanyangwa omanga komikunda dhimwe kaageko nande nande,”ta popi ngaaka.
Kansela owa ti, otashi keya kwatha woo natango okukwatathana pa ngondhi uuna pwa holoka uupyakadhi, unene pethimbo lyomvula ya loka unene ndyoka hayi etelele omafundja no sho tuu.
“Ongondhiyopeke oshinima sha simana oshoka ohashi longitha aantu nuupu momukalo gwokukwatathana mendeelelo,” ta fatulula ngaaka.
Ta ti, omakuthikuthi ngoka otaga ka kwata momikunda ndhoka ndhili kOndonga nUukwambi ngaashi Itota, Okuma, Okadhiya, Oniiwe, Onambeke Amanganga, Onampungulu, Omutomboli oshowo Uusaati Wataandela.
Kansela okwati, ehumo komeho otali ende lyuuka komeho, onkene omikunda ndhoka iinadhi mona uuwanawa natango otadhi kayambulwa po konakuyiwa.
Selam Nangombe Sheya gwomomukunda Oniiwe okwati oya kala ethimbo taya mono iihuna yokukwatathana pangondhi, nonando uuyuni wokutuma omatumalwaka okupitila moombapila olya pita.
“Onkundana ndjika oye tuthigi noondigola oshowo nenyanyu,” ta ti ngaaka.