Lazarus Hakwaake
OKATOPE – Omulumenhu wedina Junias Hauwanga (29) oshoyo Hangula Jacob (37) vomomukunda Okatope ova ngumukilwa kedu nokumbatekenwapo kedu osho sha eta exulilo lavo eshi kwa li tave fe ondungu yomeva. Osha pula efiku liyadi opo etanga lopolifi payambido lovakwashiwana li kale le shi pondola opo li kufe ko omalutu ovalumenhu ava vavali koshi yedu.
Ombelewa yoshitukulwa Ohangwena mewiliko laFillipus Shilongo okwa li ya tuma etanga lovanhu okudja kombelewa yoshitukulwa, ombelewa yoku adjaneka omeva, oshoyo kombelewa yoshikandjohoololo opo va ka ninge omakonakono e na sha naashi sha ningwa po.
Omauyelele okudja kumwene womukunda Frieda Melila okwa ti kutya ondungu ei ya mbonyoka oya tate Fillipus Shaduka. Mwene womukunda okwa hokolola kutya Shaduka okwa kuta ovalumenhu vanhe opo ve mu fulile ondungu mekove laye nelalakano loku limonena omeva okutunga eumbo laye osho yoo okulongifa meumbo. Omakonakono okwa ulika kutya momukunda omu na eenhele nhe doupomba voshiwana ovo va tulwa po kepangelo ve li meni loshinano shi fike pekilometa mbali, vavali vomuvo okwa konekwa kutya ove na omatemba okunwina oimuna omanga kamwe komuvo ka pata omolwa eengunga domeva.
Omunailonga womeumbo oo a li po poshiningwanima okwa popya yoo kutya ihava longifa omeva okudja koupomba vomeva oshiwana shaashi ove na okapomba kavo komeva opaumwene meumbo laTate Fillipus Shaduka oko ke li ashike eemeta 500.
Omukulunhu waava kwa li tava fe ondungu ova ehela oilongifo kombelewa yakamusela, opo kwa li kamusela woshitukulwa e va pa omayele opo vaha fe omolwa edu olo lipu tali dulu okungumuka diva, ashike inava tambula ko omayele oo. Kamusela ina dula naana okuya oilonga ei moshipala shaashi oilonga yopaumwene.
Fillipus Shilongo okwa ulika oukwao wananghali opamwe noonakufiwapo moshiningwanima eshi, ta ti osho pamupya. Okwa lombwela Kundana kutya Ombelewa yoshitopolwa Ohangwena oi na oshinakuwanifa sha kula shokuyandja omayakulo kovakwashiwana omo mwa kwatelwa omeva a yela. Okwa koleka kutya ope na shili omhumbwe yomeva moitukulwa imwepo moshitukulwa ashike epangelo ole shi pondola okukala la yandja omeva a yela, nomukunda Okatope oo umwe womomikunda di na omeva a yela, ye osho nee tati eshi oshi li pamupya pakuholoka shi li ngaha, osho Fillipus a ti.