New Era Newspaper

New Era Epaper
Icon Collap
...
Home / Va hala omatala mEenhana 

Va hala omatala mEenhana 

2021-07-27  Festus Hamalwa

Va hala omatala mEenhana 
Top of a Page

Ovalandifi vomomapaandanda modoolopa yaEenhana ova lulilwa okukala tava landifile momapaandaanda oule weedula hetatu paife. 

Ovalandifi ava otava nyenyeta tava ti ova hala omatala eli meni lodoolopa eli pamufika muwa opo va kale tava ningi omangeshefelo avo noupu.

Pefimbo Kundana a talela po ovalandifi ava modoolopa yaEenhana ova hokolola tava ti oyuyeemo yavo oya shuna pedu mopaife shaashi pehe na vali ovalandi va wana ngaashi sha kala shito. Ova popya kutya ovanhu vamwe iha valande vali oilandifomwa yavo shaashi ova tila ombuto yoCovid-19, shikwao vali osheshi va ti oilandifomwa yavo oili ashike momutenya shaashi ka veli momatala.

Ova hokolola tava ti navo ova hala okukala tava landifa oinima yavo momatala eli nawa ngaashi naana eedoolopa dikwao dina omatala e na oipindi tai ende nawa.

Ova ti kutya ohava kala tava tewatewa kopolifi noinima yavo ohai nyekwa ko ndele tai kapatelwa mo, onghee eshi hashi va pula opo  vekei futileko.

Ovalandifi ohava landifa oikulya yoshiwambo ngaashi omakunde, omavanda, ombidi, oufila, ongudo, omaxuku nosho tuu.

Tabitha Shanyengana okwa landifi modoolopa yaEenhana oule weedula omulongo nota hokolola ta ti unene tuu pefimbo eli lomhepo yotai pepe neenghono oshi li oupyakadi koilandifomwa yavo shaashi ohai kala yanyika ondwi efimbo keshe.

Shanyengana okwa ti pefimbo lodula oilandifomwa yavo ohai kala ya ninga oiyakanwa yodula shaashi ka veli momatala, onghee ota indile elelo lodoolopa yaEenhana opo li tunge omatala eli pamufika woshinanena ngaashi edoolopa dikwao opo ashike va kale tava landifa oinima yavo vamanguluka.

Meenghundafa a ninga naKundana omupopiliko welelo lodoolopa yaEnhana Pau Shilongo okwa ti elelo lodoolpa otali ka kandula po omukundu ou wovanhu tava nyenyeta va hala omatala eli pashinanena.

Shilongo okwa ti mopaife ngaha otava ka tunga omatala kombinga inya kuna oshipangelo shepangelo shaEenhana, omanga omatala aa akulu nawo otaa ka longululwa opo kukwashipalekwa kutya okuli pamufika muwa.  

Shilongo okwa weda po ta ti ovalandifi vo kapana nava xulife po okukala tava yofele ombelela koshi yomiti shaashi oshi li shanyika oshiponga, vo vali tava ya nauna po omiti domodoolopa yaEenhana.


2021-07-27  Festus Hamalwa

Share on social media
Bottom of a page