Festus Hamalwa
Ovalandifi vomomapandaanda modolopa yaShakati ova hala oku pewa onhele yoku landifila yeli kalekelwa ili mokati kodolopa apa pena omangeshefelo mawa opo va shiive oku mona ovalandi vahapu. Ovanangeshefa vashona vomomapandaanda ohava landifa oinima yayooloka ngaashi omapungu, omatama, eenyanga nosho tuu, tava ti ova kala noku landifa momapandaanda omido dili hetatu paife.
Ovanyenyeta kutya otava mono oixuna shaashi kave na onhele iwa yoku landifila oinma yavo. Otava ti kutya ohava kala tava tewatewa kumuni wodolopa yaShakati noinima yavo oha inyekwako kumuni waShakati.
“Otwa loloka oku kala hatu endaenda twafa oimuna. Nomokati komutenya ohatu undula outololi ile twa humbata omavela komitwe muna oinima idjuu. Efimbo limwe ohatu dengwa kovakeleli vomaliko ngeenge tave tub lombwele tu dje ponhele yonhumba,” Ndapandula Johannes ta ti.
Ova hokolola kutya unene tuu efimbo eli lodula tai loko oinima yavo oikala tai lokwa nai shaashi kave na omatala oku landifilamo, oinima yavo ikale ili meyameno ngaashi naana ovalandifi vakwao veli momatala vena oilandifomwa yavo ili momudile.
“Otwa hala epangelo li tupe onhele yokulandifila modolopa yaShakati opo tu kale atu landifa oinima yetu twamanguluka, eshi osho omukalo muwa atu longifa opo tu shakeneke epangelo ondjilakati nokukelela oluhepo”, Bertha Namupala a ti.
Ovapopya noipala tai limemesha kutya ongeshefa otai enda nawa shaashi ovalandi ohava mbomboloka momwaalu uhapu efiku nefiku opo veli landele oushike pengeyo wavo, eshi ohashi vape omukumo opo va kale tava twikile nokulandifa nonande veli meshongo lakula lonhele yo kulandifila.
Ovati kutya oministeli yiipinndi nayi kale tai talele po ovanangeshefa momapandaanda opo i kale tai tale eshi nghee tava longo noudinini nokukwashipaleka kutya navo ova talika ko ongaa ovanangeshefa vo kolela.
Pexulilo ovatwa ovanhu omukumo ava veli momaumbo veena eshi tava ningi opo vatote po oungeshefa vavo vashona vadule okulimonena okamaliwa kavo ko mondjato.
Ovati otava twikile nokulonga nelitulemo opo eengeshefa davo dixume komesho.