New Era Newspaper

New Era Epaper
Icon Collap
...
Home / Va handuka eshi ongeleka yavo ya patwa kumwene womukunda

Va handuka eshi ongeleka yavo ya patwa kumwene womukunda

2022-07-04  Victoria Kaapanda

Va handuka eshi ongeleka yavo ya patwa kumwene womukunda

Oilyo yongeleka yedina House of the Healing International Ministries kai udite ombili eshi ongeleka yavo ya patwa kumwene womukunda wavo shaashi vati ongeleka oyo hai ningi omaweelelo.

Otava ti kutya mwene womukunda oku na oukwamuhoko eshi ta tongola ongeleka yavo kutya vati otai pukifa oshiwana.

Mekondjo Kapapu ou e li mwene womukunda Oshimbibi moshitukulwa shaHangwena okwa shunifa ko oshimaliwa N$600 kongeleka eshi kwa li sha yandjwa okufuta edu.

Kapapu okwa lombwela Kundana kutya kakwa li a tala nawa mboli opo a yandje onhele yedu pa ningwe ongeleka.

“Ondi na oufemba wokupata ongeleka ngeenge itai liufa komilandu edi da tulwa po,” Kapapu ta ti.

Ongeleka okwa li ya totwa po kumumwainakadona waKapapu eshi kwa li e mu pa onhele yedu opo a ninge ongeleka momukunda.

Okudja opo omufita umwe okwa dja kOndangwa ta pula opo va kale va tula ongeleka mumwe naHilja Haipinge ou e li oye mumwainakadona wamwene womukunda.

Vati eshi Haipinge a dimina okwa pewa N$600 kongeleka opo a twale koomwene womukunda shaashi okwe va lombwela opo va fute oshimaliwa ngeenge ova hala va ningile ongeleka mumwe.

Haipinge vati ova kala vehe uditafane nomufitaongalo mukwao osho sha eta opo a dje mo mongeleka omo. 

Omufita woHouse of the Healing International Ministries, Williem Kamati okwa hokolola ta ti Kapapu okwa tameka okutotela ongeleka eendaka dihe shi doshili, ta ti otai di mo momukunda waye.

“Paife eshi e wete kutya mumwaina okwa dja mo mongeleka opo ta mono kutya ongeleka yetu otai li ovanhu? Kapapu paife ota taataa ongeleka yetu shaashi e wete ovakwapata vaye va dja mo omanga eshi kwa li mu na ovakwapata vaye okwa li ta ti kutya ongeleka oya eta elunduluko liwa momukunda,” Kamati ta ti.

Kamati okwa ti ongeleka yaye kai na omangelema okuninga eweelelo, yoo vali itai pukifa oshiwana ngaashi Kapapu ta ti.

“Kashi li pauyuuki eshi ongeleka yetu ya patwa. Ongeleka yange oya kwafela ovakwashiwana vahapu vomomudingonoko omu shaashi paife momukunda omu ihamu longwa vali oimbuluma,” Kamati ta ti.

Albertina Petrus weedula 75 oku li oshilyo shongeleka ei ya patwa, okwa lombwela Kundana ta ti ova longelwa omauwa mahapu kongeleka ei.

“Okwa li nda kwatwa komhepo yomalodu, alushe ohandi kala ashike ndi li keendingosho. Ongeleka ei oya kwafela nge yoo keemhepo dakanyata, oku dja eshi nde uya mongeleka omu paife ihandi pondwa vali,” ta hokolola.

Ndilimeke Nauyoma naye oku li oshilyo shongeleka ei, nokwa hokolola ta ti ongeleka ei oya lundulula eenghalamwenyo dounona vaye eshi kwa li hava kala alushe tava vake po oinima yovanhu ashike paife ihava vake vali.

“Okwa li ndi na eemhadi hadi kala da dinda ashike paife konima eshi omufitaongalo a ilikanena nge onda veluka,” Nauyoma ta ti.

Ovakwashiwana paife eshi ongeleka yavo ya pata ihava mono vali omayakulo ngaashi shito. 

Efiku tuu olo ongeleka imwe yoshiveva i li momukunda Onghuti mOhangwena nayo oya patwa shaashi vati tai pukifa oshiwana.

fhmalwa@nepc.com.na


2022-07-04  Victoria Kaapanda

Share on social media