Ovakainhu vatatu ova kanifa oshimaliwa shafika poN$700 000 eshi va ti va kengelelwa kukaume kavo oo va ti e li ninga ondudu yoipupulu.

Oonakuninga oihakanwa yakaume kavo, va ti ovahongifikola vavali nomukainhu umwe ha longele kouministeli wounamapya.

Ava ova hokolola tava ti okudja omudo wa dja ko muNovomba fiyo oneudo, omutamanekwa Elias Tobias (32) okwe va kengelela, heva dengele ongodi e li ninga vati omukainhu wondudu. 

Tobias oo e shi nawa ovakainhu ava fiyo okomaumbo, va ti okwa kala heva dengele a fa ngeno ondudu, teva pe ouyelele kombinga yeenghalamwenyo davo, voo tava itavele nee.

Va ti omulumenhu ou okwa kala heva dengele teva ningile omatilifo osho sha eta umewe womovakainhu a landife po otuwa yaye, a mone mo oshimaliwa shoku futa ondudu, omanga vamwe va ka lya omukuli doimaliwa ihapu keembaanga. Omulumenhu ou a eli nanga vati oye Mama Lucia, “ondudu ya kula moNamibia i li koKatima Mulilo, va ti oha lombwele ovakainhu va holeke oimaliwa koshi yomafo momiti ye tekei tala ko ngee va di po.

Umwe womovakainhu ovo Selma Kaunda (li shi edina laye loshili) weedula 27, e li omuhongifikola koRundu okwa ti okwa Tameka oku dengelwa kuMama Lucia konima yoku nyola komalungula, ta kongo omuhongifikola mukwao moshitukulwa shaHangwena ile mOshana opo va pingafane. Omukainhu ou va ti okwa li a hala oku dja ko koRundu ye e uye oku longela popi neumbo. 

“Okwa lombela nge ta ti ondi na omupya nde u pewa kovakwamungu, ta ti ota dulu okukwafela nge opo ndi mone oilonga kofikola i li mOhangwena,” Kaunda ta ti. 

Ta ti omukainhu ou okwa ti nemu tumine oN$30 000, yoku landa eengobe mbali dilaula ye a koshwe omupya. 

Ashike konima ok aka tameka ta pula vali oimaliwa ihapu, ta tin gee Kaunda ita futu ovamwainakadona otava fi. Ta ti ngee ita dulu oku futa na landife po otuwa yaye.

“Okudja opo onda landifa po otuwa yange yoPolo koN$117 000. Okwa lombwela nge opo ndi tulile ovakwamhungu oN$55 000 koshi yomuti womwoongo u li mEenhana,” Kaunda ta ti.

Konima okwa ka tya vali ovakwamhungu ova handuka nandi mu tumine oN$62 000, ngeenge inandi tuma meme wange otai eemwengu. Natango onda tuma shaashi okwa li nda tila,” Kaunda ta hokolola.

Konima vali omukainhu va ti okwa alombwela a ka lye omukuli woN$300 000 natango ei yandje kovakwamungu, koshi yomuti u li modoolopa yaRundu

“Okudja opo okwa lombwela nge ta ti opo ndi dule okukoshwa omupya onda pumbwa ndi koshelwe oshita pamwe nookahewa kange vavali shaashi va ti navo ove na omupya ngaashi wange. Ta ti nandi va dengele ndi va lombwele,” Kaunda ta hokolola.

Va ti “ondudu” oya lombwela ookahewa ava vatatu opo ve mu tumina omavano ve li hamunghele, va dule okukoshwa omupya tashi pitile momafano.

Naufiku Hango (naye kali shi edina laye loshili) weedula 28 omuhongifikola kOnhuno va ti tete okwa pulwa opo a fute oN$3000 yoku landa oikombo oyo ya pumbiwa eshi ta koshwa.

“Konima okwa ka dengela nge ongodi ta popi kombinga yofamili yange. Okwa ti okwa lombwelwa kovakwamungu opo ndi tume N$200 000 nongeenge ina ndi tuma okaana kange nameme otava fi,” ta hokolola. Okwa kalya omukuli opo a fute oshimaliwa osho a pulwa.

“Ondudu” tai mu lombwele kutya oku na ookahewa vane ovo navo ve na omupya. Okwe mu pula yoo eenomola deengodi davo. 

“Okudja opo onda mona kutya omunhu ou ondudu yoipupulu, onda mona kutya ou okutu shi nawa molwashi ota popi oinima yoshili kombinga yeenghalamwenyo detu,” ta ti.

“Onda boloka ongodi yaye, onda lombwela ookahewa kange opo navo va boloke ongodi yaye.” 

Hango okwa ti konima yomafiku ova dengelwa ongodi nonomola ipe komunhu oye tuu oo ta ti ota tula omafano avo oo ve mu tumina komalungula. Ovakainhu ova lopotela opolifi –ohaluka, kaume kavo Tobias, oo wopopepi navo oye a kwatwa po. 

Omukulunhu wopolifi koshikondo shokukonakona oimbuluma moshitukulwa shaHangwena omupedu Commissioner Zachriah Amakali okwa koleka ta ti Tobias okwa kwatwa po oshivike sha dja ko mEenhana, a hangwa kobashu yomukainhu waye.

Okwa anyenwa e li futilemo modolongo pefimbo a holoka momhangulilo yamangestalata mEenhana onghela.

Oshibofa shaye osha u ndulilwa komafiku 24 August 2023 nomakonakono opolifi otaa twikile. Amakali onghee okwa pula ovanhu aveshe ovo va ninga oihakanwa yokukengelelwa kuTobias opo va kale va lopotela opolifi diva.

fhamalwa@nepc.com.na