Ovanyasha veli 11 pamwe nakansela woshikandjohoololo sheEenhana Olivia Hanghuwo ova pewa omadeulo okulonga noimeno yayooloka ngaashi omanuwa, omakwaava, omapapaye, omandjembele nosho tuu oimeno ikwao ya wedwapo.
Omadeulo okwa ningilwa kombelewa yakansela kOnambutu oule womafiku eli avail. Ovanhu aveshe ova pewa eedjapo konima yomadeulo.
Pefimbo tava pewa omadeulo Hanghuwo okwa popya ta ti okwa pandula Matheus eshi ena oshisho novanyasha.
Kansela okwa ti ovanyasha oveli hongamo shihapu kombinga nghee ovanhu hava dulu okukala tava longo oikulya tashi pitile moimeno.
Ovanyasha ova pewa omadeulo nghee vena okukala tava longo oikulya yayooloka ngaashi okuninga ondjema, okuninga osopa tai longwa momatama nosho tuu.
Meenghundafana a ninga naKundana Heilume Matheus ou kwali ta yandje omadeulo okwa hokolola ta ti okuna ondjodi yokukala a yandja omadeulo ounamapya kovanyasha koitukulwa aishe yokoonoli.
“Ame ondi hole okulonga noimeno, okudja keendodo dange dopedu onda kala ndi hole oshihongwa shounamapya. Mopaife ngaha ondina eshiivo lounongo leedula hamano mokulonga noimeno,” Matheus ta ti. Matheus okwa ti okwa hala okukwashilipaleka kutya ovanyasha vahapu otava kufa ombinga mounapya shaashi eshi otashi xwaxwameke ovanyasha opo va kale tava longo oikulya yavo vene.
“Onda tameka ashike handi longo onga omuliyambi kombelewa yovanyasha kOutapi, omo nda kala handi longo koshikondo shounamapya pamwe novanambelewa va dja koWindheok. Onda kala handi longo noudinini shaashi okwa li alushe nda hala okushiiva okulonga noimeno yayooloka,” Matheus ta hokolola.
Okwa ti konima eshi a mona eshiivo lokulonga noimeno okwa tokola opo a kale ta yandje omadeulo nghee ovanhu vena okulonga noimeno.
“Mopaife ngaha ondina eengeshefa dange dili nhee dokulandifa oikulya yalongwa moimeno,nokulandifa omaludi oimeno. Onghee ohandi lalakanene okukala nda deula ovanyasha vahapu moshilongo vena ehalo lokulihonga ounamapya shaashi ounamapya owa fimana moshilongo,” Matheus ta ti.
Okwa ti okwa yandja noilonga kovanyasha veli 10 hava longo meengeshefa daye.
Okwa popya ta ti ookansela na va kale tava unganeke nawa ovanyasha koikandjohoololo shavo opo a dule a kale a yandja omadeulo kovanyasha.
Okwa ti ounamapya owa fimana shaashi ohau yambula po eliko loshilongo tashi pitile mokulandifa oikunomwa.
Matheus okwa ti, ota indile moshiwana opo shi muyambidide noilongifo yokukala ta longifa ngeenge ta yandje omadeulo kovanyasha, oshoka kena oilongifo ya wana okudeula ovanyasha.
Okwa yelifa ta ti okwa manguluka efimbo keshe okukala ta yandje omadeulo, onghee ovanyasha ile ookansela nava kwatafane naye konomola yongodi ei 0814145673.