Omukulunhuwiliki wouhaku moshitukulwa Erongo Anna Jonas okwa ti oshitukulwa shaye oshi na omwaalu munene wovanhu va tunhilwa ombuto yoCovid-19.

Fiyo opapa ovanhu vedulife po23,000 ova tunhilwa ombuto mErongo.

Meenghundafana a ninga naKundana Jonas okwa ta ti okwa hafifwa koshiwana eshi tashi twikile noku ya komandiki opo shi kale shatunhilwa kombuto ei. Ta holola kutya mefiku konyala ohava tunhile ovanhu vefike po700, omafiku amwe, ngaashi Etivali ova tunhila ovanhu ve dule po 850.

Jonas okwa ti omandiki okutunhila oha longo efiku keshe Omaandaxa fiyo Osoondaxa onghee oshiwana na shi twikile oku tunhilwa v ova amenwe kombuto yoCovid-19.

“Otuna omandiki okutunhila mahapu moshitukulwa shetu oko kuna ovanailonga vouhaku va wana onghee oshiwana ina shi kala tashi li pula kutya omandiki oha kala eyadi. Hano oshiwana na shi manguluke opo shi kale shaya kotunhila shaashi ohatu lalakanene opo tu kale twa tunhila keshe omunhu moshitukulwa Erongo,” Jonas yelifa.

Okwa ti mexuliloshivike tali ya otava ka kala veli meedoolopa tava yandje ehongo koshiwana kombinga yefimano lotunhila, ye ta ti otava kala yoo vali va fikama peepate opo va vendele ovanhu meetuwa davo opo ashike oshiwana shi kale shi na omukumo wokuvendwa.

Okwa denga omufindo ta ti mopaife ngaha omwaalu wovanhu tava kwatwa kombuto yoCovid-19 owa shuna pedu neenghono moshitukulwa Erongo, omo nokuli moipangelo muna ashike ovanhu va shona ovo vena ombuto ei.

“Oshitukulwa Erongo osho shimwe shomoitukulwa ei kwa li ina ovanhu vahapu va kwatwa koCovid-19, nomwaalu womafyo okwa li wa londa neenghono ashike mopaife owa shuna pedu. Ashike eshi itashi ti kutya ovanhu inava tunhilwa ile ovanhu inave li ufa komilandu doCovid-19,” Jonas ta ti.