Omunashipundi welelo laUkwanyama Eliaser Waandja okwa ti ovalumenhu inava hala okufuta ngeenge va pa oukadona omadimo nava lopotwe kelelo opo va katukilwe onghatu.

Okwa ti okwa didilikwa ovalumenhu vahapu vehe hole okufuta ngeenge va tokola ondjeva yovakainhu eshi hava faduka po.

Waandja ou e li yoo omupopiliko welelo laUkwanyama okwa kunghilila ovakainhu opo va kale tava shivifile ombelewa yoshilongo pefimbo kombinga yovalumenhu inava hala okufuta ondjeva.

Waandja ta ti omukainhu keshe a tokolwa ondjeva oku na okufutwa oshimaliwa N$3 000 ile eengobe mbali pakatendo kopamufyuululwakalo wOvawambo.

“Omhangu yetu yopamufyuulukwalo ohai ungaunga nomulumenhu keshe ina hala okufuta oifuta yomukainhu opo a kale a kwatwa po meendelelo,” Waandja ta ti.

Okwa hokolola ta ti ngeenge omulumenhu ou ina hala okufuta oha ningilwa omakonakono kutya oku li peni nokonima ngeenge okwa monika ohatu minwa omukanda tau mu lombwele opo a kale eli lopota komhangu yopamufyuululwakalo meendelelo.

“Ngeenge omulumenhu okwa dopa okuholoka komhangu yetu ngaashi shau fwa momukanda ou twe mupa petameko ohatu ningi onghendabala opo tu kwatafane neembelewa domeengestalata opo omulumenhu ou a dule okukwatwa po meendelelo,” Waandja ta ti.

Onghee okwa kunghilila ovalumenhu opo va kale ve na oshisho shokufuta ovakainhu pefimbo shaashi otashi kelele okukala va kwatwa po ile va fute oshimaliwa shihapu shehandukilo eshi kwa li ta kongwa.

Waandja okwa kunghilila yoo vali ovadali ve hole okukala tava kapula oifuta ponhele younona vavo opo ve shixulife shaashi otashi eta endu nda ko pokati komaumbo.

“Omukainhu ou a mitikwa oye e na oufemba woku pula oifuta yaye mwene nongeenge okwa nyengwa okwa munguluka okushivifila ombelewa yetu yopamufyuululwakalo opo tu katuke onghatu,” Waandja ta ti.

Okwa yelifa ta ti ovakainhu ashike ava vaha ngika vehe na okaana tava futwa ngeenge ondjeva yavo ya tokolwa.

Waandja okwa kunghilila yoo vali ovalumenhu opo va xulife po okukala tave likale omadimo avo ngeenge ove veshi kutya ove va mitika omukainhu oo.

“Ovakainhu nava shivifile ombelewa yetu ngeenge tave li kalwa kovalumenhu opo tu dule okukala twa ninga omakonakono konima ngeenge okaana ka dalwa ngeenge oye tu xee oo ile ota ludilwa,” Waandja ta ti.

Okwa weda po ta ti oshimaliwa shoifuta nashi twalwe keembelewa delelo laUkwanyama opo ku kwashipalekwe kutya osha futwa she lixwa po.

- fhamalwa@nepc.com.na