ONGWEDIVA - Ongudu yovanafikola vamwe vomoshiputudilo shopombada sha-IUM ova haluka nove li momalimbililo eshi va uda kutya mboli inava wana okufutilwa kehangano lepangelo hali futile ovanafikola loNamibia Students Financial Assistance Fund (NSFAF).
Ovanafikola ovo va pula vaha tumbulwe komadina ova popya kutya voo neudo ove lishangifa okulihongela oilongwa yeifano loLogistics and Transport Management oyo opo ye ya mo moshiputudilo. Eshi ve lishaningifa okoosa ei, vahapu vomuvo ova popya kutya voo kava li ve shi ngeenge oshilongwa osho inashi tambulwa natanago koNamibian Qualifications Authority (NQA).
Ova weda po kutya NSFAF okwa ti yee ita dulu oku va futila shaashi NQA ina yandja epitiko koilongwa oyo. “Otwa teelelwa tu fute shaashi ekonaakono ola fika ashike katu na oimaliwa fye katu na ou te tu futile,” umwe womovanafikola ta tumbula.
Ovanafikola vakwao ova weda po yoo kutya ovakulunhu vavo kave shi ngeenge ove na eendjo dofikola, voo vahapu ihava longo. Vamwe vati ova lombwelwa kutya itava dulu okushanga ekonaakono ve na eendjo dofikola. Omupopiliko woshiputudilo sha-IUM Jerry Munyama okwa popya kutya ovanafikola ova shiivifilwa nale kutya oilongwa oyo oipe notai ka pula efimbo opo NQA ei yandjele epitikilo, nonghee ihai futilwa ku-NSFAF.
“NQA naye oku na omilandu daye odo ha shikula mokuyandja omapitikilo e na sha noilongwa ile omaifano,” Munyama ta tumbula.
Okwa weda po yoo kutya, ofikola oya pitika ovanafikola ava va shange omakonaakono, ashike okwa teelelwa va fute eshi ve na po manga. Munyama ta ti fiyo opapa IUM okwa teelela enyamukulo okudja ku-NQA opo va dule okuya komesho nasho. Munyama okwa twa yoo ovanafikola omukumo opo vaha sholole melihongo lavo, ta ti aishe otai ka kala nawa.
“Ondi na omukumo kutya oilongwa ei otai ka tambulwa ko ku-NQA,” Munyama ta ti.