Omukulupe womusamane pamwe nounona vaye vavali ova fya omanga omukulukadi waye nokaana kamwe ove li moshipangelo shaKatima Mulilo eshi vati va lya omashini oo va landa komukwapata wavo ha landifile momatala aKongola Mwanzi moshitukulwa shaZambezi.

Onaakufya ovo Fredy Ziezo weedula 67, Prenah Matengu weedula 11, naEdgar Ziezo weedula mbali.

Omupopiliko wopolifi moshitukulwa shaZambezi Sitali Kisco okwa hokolola ta ti Ziezo okwa li a ka konga oshivelelwa komatala nokonima okwa hanga omashini e na ombilixa taa landifwa komukwapata waye umwe.

Opolifi oya ti eshi omukulupe a landa omashini okwa ya keumbo opo a twalele ovaneumbo vaye va ka lye. Opolifi oya koholola tai ti konima yokafimbo ka shona eshi ovanhu va mana okulya ova tameke tava kungu aveshe nokonima ova twalwa koshipangelo shaKatima Mulilo.

Ziezo okwa fya xulifa efimbo longula potundi 06h00, omanga okaana kamwe oka fya Omaandaxa efimbo lokomatango nokativali okaana aka kashona kuvakwao oka fya Etivali efimbo longula.

Otaku hokololwa omukadi wa Ziezo nokaana, ava veli moshipangelo, veli monghalo ii.

Opolifi oya ti kapena omufekelwa a kwatwa po fiyo opapa ashike omakonakono opolifi otaa twikile.

Opolifi oya ti oshiwana otashi kashivifilwa nale ngeenge omalutu oonakufya a pu okuningilwa omakonakono. – fhamalwa@nepc.com.na