Omukainhu weedula 22 nomulumenhu weedula 30 ova kwatwa po Etine omanga omukainhu umwe weedula 26 naye okwa kwatwa po Etine eshi va hangika tava landifa omiti dokukufa mo omateelelo moWindhoek.
Edi oda kolekwa komupopiliko wopolifi moshitukulwa shaKhomas Warrant Silas Shipandeni eshi a hokolola ta ti omukainhu nomulumenhu ova hangika kopolifi yomoshilando shaWindhoek tava landifa omiti di li pongushu yoshimaliwa N$3 200 kendiki lomangeshefelo moWernhill Park.
Omukainhu umwe yee okwa hangika naye ta landifa omiti dokukufa mo omateelelo di li pongushu N$600 molukada loDamara efimbo longula.
Shipandeni okwa ti ovafekelwa aveshe ova pewa obooloha konima eshi va holoka momhangu yaKatutura Etitano, nomakonako opolifi otaa twikile.
Okwa kunghilila oshiwana opo shi xulife po okukala tashi kandifa oinima ya nyika oshiponga onghee ku keshe ou ta ka monika ta landifa oinima ina i pitikwa okulandifwa ota ka pewa ehandukilo lopaveta.
Okwa weda po ta ti ovanhu inava hetekela okukala tava lande oinima ya nyika oshiponga momapandaanda shaashi eshi otashi dulu oku va tula moudjuu ngeenge ova hangika kopolifi ve na oinima oyo.
“Oshiwana nashi kale tashi lopotele opolifi efimbo keshe kombinga yovanhu tava landifa oinima ya nyika oshiponga,” Shipandeni ta ti.