Festus Hamalwa
Ovanhu vavali –omulumehu weedula 21 nomukainhu womido 43 –ova fya, eshi va dipawa omadipao a nyanyalifa moiningwanima ivali ya yooloka moshitukulwa shaShikoto, onguloshi yOmaandaxa.
Onaakufya ovo Festus Shaamwapeni Gebhard (21) oo a dipaelwa kOshigambo efimbo loufiku potundi 22h00, naLinda Johannes oo naye a dipawa potundi 22h00 momukunda Onethika. Omupedu Commissioner wopolifi moshitukulwa shaShikoto Petrus Shigwedha okwa hokolola ta ti Gebhard okwa li ve li ponhele yondingosho pamwe nakaume kaye ou eli omufekelwa paife tava nu omalodu eshi veli pilukila po. Okwa ookaume ava ova ka tameka tava ta nguna kutya vati naakufya okwa vaka po oshitende shokotuwa shomufekelwa oshivike sha djako. Shigwedha okwa ti okudja opo omufekelwa okwa kufa ombele yokapi ei kwa li a homata moshiya ndele ta tu Gebhard nokuxulifila ponhele opo efimbo olo.
Omufekelwa okuna eedula 30, nokwatwa po kopolifi efiku tuu olo a longa oshimbuluma.
Ovakwapata vaGebhard ova shiivifilwa efyo eli, nomakonakono opolifi otaa twikile. Efiku tuu olo loufiku Omaandaxa potundi ya fafana Shigwedha okwa koleka efyo lomukainhu oo a xulifa eshi a dengwa fiyo omefyo kohonda yaye.
Shigwedha okwa hokolola ta ti Johannes okwa li veli poundingosho tava nu pamwe nakaume kaye komoihole ei ili omufekelwa paife. Omufekelwa vati okwa ka dja po pokamba noku ya keumbo ta ota ka teleka shaashi okwa fya ondjala. Eshi a mana okutelaka okwa ya konduda yanakufya ili popepi noundingosho opo kwa li tava nu.
Opolifi oya ti eshi omufekelwa a fika ponduda yanakufya, okwa hange nakufya eli monduda nomulumenhu umwe.
Vati omufekelwa okwa kala ta konghola ponduda yaHohannes ashike ina patululwa. Okudja opo okwa ka hondama konima yondingosho ili popepi nonduda yaJohannes.
Shigwedha okwa ti eshi Johannes a mona kutya omufekelwa okwa dja po ponduda yaye, okwa patulula po opo omulumenhu ou kwa li veli naye monduda a faduke po.
Omulumenhu okwa faduka po meendelelo, a yuka moixwa. Eshi ngo omufekelwa a mona kutya Johannes okwa patulula po ponduda yaye okweya ndele ta tameke okudenga Johannes noshitenda, nokonima okwa ka kufa omupini woshiti ndele ta twikile oku mu dengaula fiyo omefyo. Opolifi oya ti Johannes okwa kala a mona oshiponga neengono okwa li ta di ohonde ihapu neenghono komutwe nokoshipala. Konima eshi omufekelwa a mona kutya Johannes okwa xulifa okwa ka lombwela ovashiinda opo ve u ye vatale.
Ovashiinda eshi ve u ya ova hange nale Johannes a xulifa eli mexungu lohonde tai kunguluka. Omufekelwa omunamido 36, oo eli omufita woimuna pomukunda opo, a dile kushimwe shokoitolwa yaKavango.
Opolifi oya ti omufekelwa okwa twa po efiku olo a longa oshimbuluma konima eshi ovashiinda va lopotela opolifi. Ovakwapata vaJohannes ova shiivifilwa efyo laye, nomudimba waye owa twalwa kokila koshipangelo shaNandjokwe.
Omakonakono opolifi otaa twikile.