Ovalumenhu vavali ova fya eshi ve li mangelekela momiti Etivali moshitukulwa shaShikoto.

Umwe womoonakufya, omulumenhu weedula 36 Metodius Kaupula Lukas oo e li mangeleke. Oshiningwanima eshi osha ningilwa momukunda Onambiya. Nakufya mukwao, Otto Simaneka Nembungu (46)oo okwe li mangelekela komukunda Onanke.

Omupopiliko wopolifi moshitukulwa shaShikoto Inspector Ellen Nehale okwa hokolola ta ti Nembungu okwe li tuwa eli meemhango momuti uli popepi noundingosho opo kwa li ta nu efiku olo.

Vati okwe li xulwa okumonika efiku tuu olo efimbo lomutenya koundingosho e kwete ongodi peke oyo a hangika e li mangelekifa nayo.

Opolifi oya hokolola tai ti Lukas naye okwe li tuwa eli meemhango efimbo lomoshanga shomutenya kovakwashiwana kwa li tava ende pondjila opo.

Oonakufya aveshe ina va fiya po omikunda ta di yandje ouyelele kombinga yomafyo.

Ovakwapata vavo ova shivifilwa kombinga yomafyo avo nomakonakono opolifi otaa twikile.

Nehale okwa kunghilila oshiwana opo shi kale tashi ka konga omakwafo kovaxungimwenyo novafitaongalo ngeenge she li hanga tashi hepekwa koupyakadi wopamadilaadilo.

Okwa ti ovanhu ve na oukwatya wokulimangeleka nava lopotwe pefimbo opo va dule okukala va pewa omayakulo exungomwenyo shaashi oku li kufa omwenyo ka kushi e kandule po lomukundu ndele eshi itashi eta po omukundu kovakwapata.

– fhmalwa@nepc.com.na