New Era Newspaper

New Era Epaper
Icon Collap
...
Home / Vikta Juiceboy a tseyitha esiku lyepititho lyoalbuma ye ompe

Vikta Juiceboy a tseyitha esiku lyepititho lyoalbuma ye ompe

2019-04-12  Pinehas Nakaziko

Vikta Juiceboy a tseyitha esiku lyepititho lyoalbuma ye ompe

WINDHOEK-Lya ninga natango ethimbo lyaJuice Viktaboy ngoka a kala nokulonga nuudhiginini ngele tashi ya poku ulika uunongo we moongalo, nokunyanyudha aaholi yoongalo dhe mpaka naampeyaka.

“Ngele owe shi tula miilonga, kapu na shoka tashi kuthikamitha. Ondi li nda nyanyukwa okutseyitha kutya oalbuma yandje yotango otayi piti pehulilo lyomwedhi nguka (Apilili 30),” Vikta a popi ngaaka komalungula.

Okwa ti oalbuma ye yotango otayi lukwa Bless Up molwomayambeko ngoka gokwiimba a pewa kuKalunga. Okwa tseyitha ishewe ta ti oalbuma oyo tayi ka kala oyo yimwe dhingi moongalo ndhoka tadhi ka pita omvula ndjika. 

Nonando Vikta ina popya naana kutya omaimbilo ogeni nagangapi taga ka kala moalbuma ndjika, oyendji oya tegelela ashike oongalo ndhoka dha tsokoka nodhadhenga mbanda, oshoka okwa pititha nale ndhoka tadhi nyuwitha omakutsi. 
Vikta omuhikingalo ngoka a kala noku shi enditha nawa ngele tashi ya moongalo, unene mokwiimba pamwe naahikingalo ooyakwawo ngaashi Exit, Sunny Boy, okutumbula po ashike yamwepo.

Omwiimbi ngoka a yambukile monooli yoshilongo e na ashike oomvula 20 oku li a tseyika nawa nongalo yedhina Meriam Kaxuxwena, ndjoka oyo ongalo ye ontintatu, noya li ya taambwa ko nawa kaakwashigwana. 
Omwiimbi nguka e li ishewe omushangingalo, omundaanisi nomuningi gwomikwelengendjo, osho wo omunasikola poshiputudhilo shopombanda shuungomba shaNamibia (NUST) okwa tsakanene noshifokundaneki shika, okupopya ondjila ye ndjoka a enda, nankene a ningi omuhikingalo.

Vikta Juiceboy okwa ti ye mehangano lyoongalo okwa li a holokele mo mo2016, pethimbo a li a imbi okangalo ke kotango kedhina Come to me (Ila Kungame), moka a li a kwathelwa okwiimba kuSunny Boy. Ngashingeyi oku li a imba nale pamwe naahikingalo mboka aanene moshilongo, moongalo ndhoka dha kala nokudhanwa shinene noonkondo mpaka naampeyaka.
Kakele kongalo ye ndjoka yedhina Ila Kungame, Vikta oku li ishewe a imba pamwe naExit naNeslow mongalo Atweende. `Ongalo onkwawo oondjoka yi li moalbuma ompe yaExit, yedhina Omadhina Omanene. 

Vikta,  ngoka ta ti nonando kashi shi oshipu okukala omuhikingalo moshilongo, ye oku li ta pula komeho, nokwa tengenekwa a ka kale a pititha nokuli okavidio kongalo ye yedhina  Meriam Kaxuxwena, oshowo Ken Jou Ma Jy Es Hierso. 


2019-04-12  Pinehas Nakaziko

Tags: Khomas
Share on social media