New Era Newspaper

New Era Epaper
Icon Collap
...
Home / Wa yi mooyina, naRukoro okwa pewa olukaku kuNFA”

Wa yi mooyina, naRukoro okwa pewa olukaku kuNFA”

2019-02-15  Shipi Elago

Wa yi mooyina, naRukoro okwa pewa olukaku kuNFA”

OSHAKATI-Olugodhi lwomomuzimbi ndoka lwa kala talu dhingoloka moombonge dhokatanga kokoompadhi olwa hulu nomiya dhaShinana.

Amusha kalya li lya shila Barry Rukoro nawa Etitatu lya za ko ngoka a li a pewa ontumwafo yo ku mu laleka moshilonga she shuuAmushangandjayi woNFA.

Shika osha landula etokolo elulu nolya yaga kegonga ndyoka lya li lya kuthwa kokangundu okape hoka ka dhikwa kuFIFA moNamibia hoka ke liwe komeho kuHilda Basson-Namundjebo, hoka ka li ka faalele Rukoro ontumwfo tayi mu laleke miilonga onga Amushangandjayi gwoNFA, noya li ya thindikilwa koshipandi shomiya dhaShinana mboka ya li ya homata nokomayego.

Ombaapila ndjika oya li ya pandula Rukoro sho a li a longele NFA, noku mu indila opo a thige po oombonge dhaNFA muule wowili yimwe konima sho a li a pewa ombaapila ndjika.

Rukoro okwa li wo a lombwelwa opo a gandje osheenditho shaNFA shoka a kala halongitha niinima ayihe yaNFA, ta lombwelwa wo kutya ngele opu na shoka NFA e na oku mu futa otashi ka ningwa meni lyomasiku giilonga ge li gaheyali.
Okangundu kopawulumompumbwe oka li ka dikwa kuFIFA moNamibia opo ka kuthe okaputa mepya mokatanga kokoompadhi, nokugalulila osheenditho shaNFA kopate konima sho sha li sha tulwa koongudhi kuMbidi naRukoro mboka ya kala nokulwa iita iitalala konyala uule womimvo mbali.

Rukoro ngoka a kala koshipundi shuuAmushangandjayi woNFA konyala uule womimvo 13, okondalaka yiilonga ye moNFA oya li ya thiki pehulilo omumvo twa zi nelelo lyaNFA ekulu olya li lya tokola momitse dhawo opo li lelepeke okukala kwa Rukoro moNFA nando ka li a pewa okondalaka ompe.

Rukoro okwa li a holoka miikundaneki ya yooloka moshilongo moka a li a takele FIFA omutanganwe ta ti ye ina pewa iilonga kuFIFA na keshi omuniilonga gwaFIFA oshoka ye okwa pewa iilonga kuNFA noNFA oyo owala yi na uuthemba wokuthikitha okondalaka ye pehulilo.

Ashike Rukoro ngoka a okwa li e shi yeleke kutya ontsezi ihayi si ngonzinzi nota tsikile okulwa sigo okominute dhahugunina opo a galule ehala lye okupitila moohahende dhe.
Okangundu haka okape oke li miilonga sigo omomasiku 31 Mai, moka ka tegelelwa opo ka kale ka dhika po olutu newiliko epe lyaNFA.


2019-02-15  Shipi Elago

Tags: Oshana
Share on social media