New Era Newspaper

New Era Epaper
Icon Collap
...
Home / Walaula: Epangelo nali endelelithe iipotha

Walaula: Epangelo nali endelelithe iipotha

2022-08-01  Victoria Kaapanda

Walaula: Epangelo nali endelelithe iipotha

Elenga enene lyOmbandja Matias Walaula okwa holola euvonayi molwa iipotha yaantu taya pangulwa melelo lyopamuthiguliulwakalo ihaa yi manithwa koombelewa dhoshikondo shuuyuki.

Omatokolo haga ningwa moompangu dhomalelo gopamuthigululwakalo ohaga tumwa koshikondo shuuyuki, hoka hagaa ka talika lwahugunina noku manithwa.

“Uupyakandhi ohawu zi mompangulilo yopevi moshitopolwa shetu, oshoka otwa li twa yelithilwa kutya iipotha mbyoka ohayi galulilwa konooli , ihe ihayi thiki ko komalelo getu,” ta nyenyeta ngaaka.

Walaula okwa li a nyenyeta ngaaka komeho gokakimitiye kiilyo yomutumba gopashigwana oshowo kolutu lwiigwana yahangana,  hoka ka li ka taalele po omalelo gopamuthigululwakalo monooli, oshiweke sha zi ko, okupulakena omaupyakandhi ga taalela omalelo gopamuthigululwakalo.

Ta ti, shika inashi holoka ashike melelo lyOmbandja ihe otashi nyenyetwa komalelo agehe monooli ka kele kelelo lyUukwambi.

“Omatompelo gamwe twa mono ongoka kutya aapanguli oye na iilonga oyindji, ngele osho shi li ngaaka oshike itapu gwedha omupanguli gumwe, iilonga yi shonopale,”ta pula ngaaka. Walaula ta ti, okupangulwa ko malelo gopamuthigululwakalo okwa li kwa simanekwa moshigwana, ihe paife okwa kanitha ongushu oshoka iipotha yawo ihayi kandula po omaupyakandhi  molwashoka  ihayi thiki pe hulilo. “Otashi ulike ethano lyi li ngiini ngele aantu taya kala taya taandeleke kutya okwa li ya yono nokutulilwa mo oshipotha, ihe kape na shoka sha ningwa po?” ta pula ngaaka. Omunashipundi melelo lyopamuthigululwakalo lyOmbandja Kaleb Hamwele, okwa li a totha mo uupyakandhi woshinakugwanitha shaanilonga yetanga lyopolisi oku ya thindikila kaatamanekwa.

“Nonando ekwatathano lyetu nopolisi opo ngaa lyi li lyopakana, otwa hala shi kale oshinakugwanithwa shaaluhe, ya kale taye tu kalele po uuna ku na oompangu nenge ya kale po aluhe uuna ku na mpoka taku tumwa,” ta fatulula ngaaka.

Ta ti, shoka otaye shi pula omolwa aatamanekwa mboka haya kala inaa yahala okushaina oombapila ya tuminwa nenge inaaya  hala okupulakena mompangu uuna taya pangulwa.

Hamwele natango okwa popi kutya oshimaliwa shoka haya tambula inashi gwana. “Unene aatumwa, aaopaleki oshowo aanambelewa,” ta ti ngaaka.

Omunashipundi gokakomitiye kiilyo yomutumba gwopashigwana oshowo golutu lwiihangana yahangana Kletus Karondo okwa ti, oya talele po omalelo gopamuthigululwakalo gomonooli miitopolwa ine, Oshana Omusati, Oshikoto oshowo Ohangwena.

“Elalakano okutala okatendo hoka ka li ka tulwa miilonga, opo omalelo gopamuthigululwakalo ga kale pondondo yimwe noompangulilo dhepangelo,” ta fatulula ngaaka. Ta gwedha po kutya oya li ya hala okuuva ngele okatendo hoka oke ya pa omaupyakandhi ga gwedhwa po, oshowo ngele onkalo yiimbuluma.

“Otwa hala okuuva ngele imbuluma oya londo nenge oya shuna pevi okuyelekanitha nokatendo okakulu,” ta fatulula ngaaka vkaapanda@nepc.com.na


2022-08-01  Victoria Kaapanda

Share on social media