New Era Newspaper

New Era Epaper
Icon Collap
...
Home / Walvis Bay yokoushai oi na ovanhu vahapu ve li moluhepo

Walvis Bay yokoushai oi na ovanhu vahapu ve li moluhepo

2021-06-09  Festus Hamalwa

Walvis Bay yokoushai oi na ovanhu vahapu ve li moluhepo

Okwa didilikwa ovakalimo vomoshikandjohoololo Walvis Bay yokoushai moshitukulwa Erongo veli moluhepo loikulya. 

Meenghundafana a ninga naKundana kansela woshikandjohoololo osho Florian Tegako Donatus okwa hokolola ta ti ombelewa yaye oya didilika omwaalu muhapu wovanhu vomoshikandjohoololo shaye veli moluhepo loikulya neenghono.

Donatus okwa ti oshiwana ohashi mbolokotele kombelewa yaye shili momwaalu muhapu efiku nefiku tashi kwena ondjala.

“Onda talela po omalukanda mahapu omoshikandjohoololo shange, omo nda dilika ovanhu vahapu tava mono oixuna, va pumbwa oikulya. Keshe efiku ohandi yakula omanyenyeto taadi moshiwana,” Donatus ta ti.

Kansela okwa ti oha ningi ongheendambala yokulongifa oshimaliwa tashi di mondjato yaye opo a landele ovakwashiwana oikulya. Okwa ti eshi oshili eshongo lakula moshikandjohoololo shaye shovanhu veli momhumbwe yoikulya momaumbo avo, yee ta ti oshikandjohoololo shaye osho shimwe shi na eebashu hadipi luhapu. “Ngeenge owa ende pombelewa yange oto hange po ovanhu veli momukweyo tava kongo oilonga, oikulya,noikwafifo yomaumbo,” Donatus ta ti.

Kansela okwa yelifa ta ti ombelewa yaye iha i mono oikulya tai di kepangelo ngaashi nanaa oikandjohoololo ikwao hai pewa oikulya yandja kepangelo.

“Efimbo limwe ohandi kakonga oikulya kovanangeshefa vomodolopa yaWalvis Bay opo ndi dule ndipe oshiwana shange oikulya eshi shili momhumbwe, “Donatus ta ti.

Kansela okwa indila oshiwana, ovaleli vopapolitika, ovanangeshefa opo va yambidide ovakalimo vomoshindhjohoololo shaye nakashona vena po. Okwa ti kukeshe ou ena ehalo lokuyambidida oshiwana shomoshikandjohoololo shaye nakwatafane lombelewa yaye.


2021-06-09  Festus Hamalwa

Share on social media