Kansela woshikandjohoololo shaGongo Daniel Megameno okwa kunghulila ovanhu womoshikandjohoololo shaye opo va xulife po okukala tava i keendingosho efimbo loilonga shaashi ovanhu ova pumbwa okukala tava longo momapya peevili dongula.

Okwati unene tuu efimbo eli lodula ili metifa lokuloka ovanhu nava tameke okuninga omalongekido nghee vena okulonga momapya avo ngaashi okulongekida eembuto nokututa oushosho. 

Kansela okwa ti osha fimana ngeenge ovanhu teve li tulamo okulima pefimbo opo va maneko  omapya avo diva nokukwashipaleka kutya aishe oya tulwa peenhele.

Edi Megameno okwe dipopya pefimbo a ninga eenghundafana naKundana Etine eshi a hokolola ta ti ombelewa yaye oya didilika ovakalimo vamwe ve hole okuya keendingosho eevili doilonga eshi shili shapuka unene.

“Ovanhu nava kale tava yandje oshihopaenenwa shiwa kuvakwao opo va kale va xwaxwamekwa okukala tava longo noudinini momapya avo shaashi ngeenge omunhu a longa noudinini oha teya shihapu mepya,” Megemeno ta ti.

Okwa ti oovene vomikunda nava kale tava kunghulile oshiwana opo shi xulife po okuya keendingosho efimbo longula shaashi eshi otashi kufa ovanhu omukumo wokukala tava longo momapya avo.

“Eendingosho nadi patulwe eevili domutenya ngeenge ovanhu va dimbuka momapya shaashi inashi fimana ovanhu va kale tava i keekamba eengula dinene,” Megameno ta ti.

Kansela okwa ti oshiwana nashi kale tashi kwatafana nombelewa younamapya yomoshitukulwa shaMusati ngeenge sha pumbwa ouyelele uli kombinga younamapya.

Okwa weda po ta ti ombelewa yaye oya didilika amashongo aa taalelwa kovakalimo ngaashi omhumbwe yeepate, noupangelo veli kokule onghee okwa kunghulila oshiwana opo shi kale shangungumana omanga epangelo tali kendambala nokuninga omalongekido okukandula po omikundu odo.  “Natu longeni nelitulemo momapya etu opo tukondjife ondjala noluhepo, nokushakeka epangelo ondjilakati tashi pitile mounamapya,” Megameno ta ti. – fhamalwa@nepc.com.na