Victoria Kaapanda

ONGWEDIVA- Omukalimo gwomomukunda Elyambala mOngwediva onkene e li ku uvite ombili molwoshiningwanima sha ningwa uule woomvula 23 dha pita sho anuwa ya  li ya tembudhwa pehala lyawo shaa li pahalo lyawo kElelo lyondoolopa yaNgwediva.

Vilho Kalimba okwa li a gandja omanyenyeto ge kuKundana ta ti oye  wete ya fa ya kengelelwa kElelo lyondoolopa yaNgwediva sho ya li ya tembudhwa pehala lyawo momumvo 1996, noya li ya futwa uumaliwa uushona inawu kwatela mo omiti ngaashi shi na okuyalulwa.

Kalimba omwana gwaLisias David Kalimba, mwene gwehala okwa ti Elelo lyondoolopa yaNgwediva olye ya kengelela oshoka etompelo okwa li lyokutunga po nokuyambula po oshowo okuhumitha komeho ondoolopa yaNgwediva, ihe omimvo 23 dha piti inaa puya elunduluko lyasha.

“Shoka tashi tu lulumike ooshoka kutya pehala otwa tembudhwa po ihe sigo onena opwa mbwalangandja ashike po ope na ashike omano nomalambo taga tutwa omavi kumuni nokaakwashigwana. Muni okwa li a yalula omapya getu mwa kwatelwa omiti  kongushu  N$86 000, ihe katu wete shi li mondjila oshoka ehala lyetu enene noonkondo,” Kalimba ta ti ngaaka.

Ta gwedha po ta ti oya kengelelwa oshoka kash ali kehalo lyawo, oya li ya itaalithwa oshoka oya lombwelwa kutya pehala mpoka otapu tungwa oofakitoli opu ku humithwe komeho ondoolopa.
Taya popi nongeyo kutya omukunda gwawo ogo gwa li gwa tembudhwa tango komikunda adhihe mOngwediva, ihe sigo onena inagu tungwa sha ogu li ashike ngaashi ye gu thigile, omanga omikunda ndhoka dha ka landulako dha tamekwa nale okutungwa.

“Ond ali nda popi nokupula omapula omukuluntu gwomakwatathano mombelewa yElelo lyondoolopa Jackson Muma, kutya itatu vulu okufuta iimaliwa mbyoka ya li ya futwa opo tu pewe ehala lyetu, nenge tu pewe ombinga yimwe yehala,” Kalimba ta pula.

Ta ti oya li ya tsu kumwe naakalimo ayehe mboka ya li ya tembudhwa pomahala gawo momukunda moka, noya tokola okutula mo ekanka momasiku omafupi taga landula. Ta gwedha po ta ti omapulo agehe Muma okwa li e ga yamukula ta ti okatendo hoka taka longithwa nuumvo hako komimvo dha piti, ethimbo kwa li ya tembudhwa oya li ya tembudhwa sha ikolelela kokatendo hoka kwa li taka longithwa ethimbo ndoka, ihe inaka fathathana na hoka ta ka longithwa nuumvo.

Ta ti Muma okwa ti itashi shuwa nando ya pewe ehala ndyoka omanga lya landwa po nale kumuni, oshoka natango oye li metifa nokutunga pehala mpoka.
Kundana sho a li ta ningi onkambadhala yokuninga omapulaapulo pangodhi, Muma kakwa li ta monika ethimbo ndyoka.