ONGWEDIVA - Aakalimo yomomukunda Otjaandjamwenyo moshikandjohogololo shaRuacana oya mono okapomba komeya, sho ya ningi omimvo odhindji taya nu omeya ga kaka oshowo pamwe niimuna.
Okapomba komeya komomukunda moka, ok ali ka pata momumvo 1999, sho ka li ke na oondjo odhindji ndhoka dha li dha nyenge aakalimo okufuta.
Omuhwahwameki Tjikomeno Jackson Meliheketji, omupangi payithano moshipangelo oshinene shaKatutura okwa ti, omwenyo gwe ogwa kala gwa yemata oomvula odhindji sho a kala a tala oshigwana tashi nu omeya inaaga yela oshowo pamwe niimuna. “Omeya ogo omwenyo, onkene okwa li nda tokola oku iyambela aakalimo yomomukunda moka nokapomba komeya ga yela. Shoka okwa li nde shi ningi onga omunyasha ndi na olukeno oshowo oshigwana komutima. Osh akala tashi nyenyetele ndje sho nda tala oshigwana tashi mono iihuna omanga tandi vulu okukwathela nokashona ndi na po,” Melihetji ta ti ngaaka.
Ta gwedha po ta ti, omeya ngoka ga kala taga longithwa koshigwana shomoshitopolwa moka inaga yela, notaga vulu oku etela aakalimo omikithi dha yooloka. Ta ti uuyogoki owa pumbiwa ethimbo kehe. Unene ethimbo ndika lyoCovid-19 omeya ogo taga dhana onkandangala okukeelela omukithi ngoka kaagu taandele. Meliheketji okwa gwedha po ta ti, iimuna yawo oya kala tayi nu metale lyomeya ga kaka, hoka hayi ende oometa dha pita puhamano.
Okwa popi ta ti, ndika etameko ashike oshowo oshiholelwa kaanyasha aakwawo.
Ta ti ongundu yawo yaanyasha moshitopolwa shaRuacana oyi na edhiladhilo tali ka tulwa miilonga muule wethimbo efupi okugandja ooproyeka kaanyasha.
“Oopreyeka ndhoka odha nuninwa aanyasha opo ya tameke okunyangadhala, ya mone iiyemo yoku ikwathela yoyene oshowo okutsakaneka epangelo ondjilakati,” Melihetji a popi ngaaka. Natango okwa li a lombwele aakalimo yomomukunda Otjaandjamwenyo kutya okapomba hoka otaka ka longithwa kukehe gumwe momukunda oshowo komikunda dhopopepi. Ta ti, elalakano kali shi ashike okugandja omeya momukunda moka, ihe omeya otaga ka longithwe kukehe gumwe.
Okwa li a gandja oshinakugwanitha kaakalimo yomomukunda moka opo ya hogolele okapomba mpoka taka tentekwa, ya tala koombinga adhihe kutya kape na ngoka e li kokule nenge e li popepi nako, ihe oke na okutulwa pokati kaayehe.
Meliheketji okwa kumagidha oshigwana, opo shi kwate omeya nuukeka. Ta ti inahala sho ta ka galuka omeya oga hepekwa.