New Era Newspaper

New Era Epaper
Icon Collap
...
Home / Ya ningi aanelago okufutilwa eyilongo kuNored

Ya ningi aanelago okufutilwa eyilongo kuNored

2021-05-12  Victoria Immanuel

Ya ningi aanelago okufutilwa eyilongo kuNored

Aalongwa ye yatatu moshiputudhilo shopombanda Jose Eduardo dos Santos mOngwediva oya ningi aanelago sho ya li ya hogololwa maalongwa aakwawo ye li 150, okumona ompito yokufutilwa eyilongo lyawo uule womimvo ne dhu udha mwa kwatelwa olukalo.

Aalongwa ayehe kumwe otaya  futilwa kehangano lyomalusheno Nored iimaliwa ayihe kumwe N$460 000.

Omunani gwehangano lyomalusheno Nored, Fillemon Nakashole okwa ti, ehangano olyi na ohokwe nelongo, sho oshoka ta li kwathele aalongwa okuyayambidhadhi meyilongo lyawo, opo uuna ya mana, ya ka gandje wo uunongo wawo moshilongo noku shi humitha komeho.

“Aalongwa mboka ya hogololwa, otaya landula yakwawo twa li twe ya kwathele okufutila eyilongo lyawo, ye li yahamano omimvo dha yi. Gumwe okwa li a mana eyilongo lye, notu li naye ta mono edhewulo opo a mone ompito yiilonga  mehangano lyetu.  Yane natango otu li nayo taya idheula natango, nonando inaya mana eyilongo lyawo,” ta popi ngaaka.

Nakashole okwa ti, aalongwa yamwe oye na omagano nohokwe yokutsikila eyilongo, ihe olundji uupyakadhi oshimaliwa. 

“Shoka osho Nored a kutha onkatu okukala ta yambidhidha aalongwa mboka ye li lela mompumbwe,”  ta ti ngaaka.

Shika oshikando oshititatu Nored ta kwathele aalongwa ye li mompumbwe.

Ta gwedha po ta ti, pehulilo lyeilongo lyawo, Nored oku na etengenekothaneko okukala ta dheula aalongwa mboka, opo ya mone  kale taya mono oompito dhiilonga mehangano ndika.

Nakashole okwa li a kumagidha aalongwa  aanelago ya mono ompito ndjoka, ye yi longithe  ya itula mo opo ya ka andjaneke wo uunongo wawo.

Aanona mboka ya mono ompito ndjika ombwaanawa oyo, Lahja Amadhila, George Thindhimba taya ilongele Electrical Engineering, nonzapo yoBachelor oshowo Tanyereo Mutelembi ta ilongele oComputer Scince.

Amadhila  okwa popi esiku ndyoka ta ti, okwapandula ko mpito ndjika a mono. 

“Shika oshe ya onga ombaadhilila oshoka kakwa li ndi shi ngele otandi zi mo mo ati kaalongwa aakwetu ayehe 150,” ta ti ngaaka.

Thindhimba okwa ti, otaka longitha ompito ndjika a dhiginina, oshoka elongo olya simana, nuuyuni oto wu lundulula ashike uuna wa mona elongo.

Nakashole okwa li a fatalula esiku ndyoka kutya, ehogololo lyaalongwa yatatu okumona ompito ndjoka, ohali kala lya kwata miiti oshowo sha ikwatelela kiitsa okuza po38.


2021-05-12  Victoria Immanuel

Share on social media