New Era Newspaper

New Era Epaper
Icon Collap
...
Home / Ya pewa omakwatho

Ya pewa omakwatho

2022-05-27  Staff Reporter

Ya pewa omakwatho

Hilma Nakanduungile

 

Oshandi- Ombelewa yoshikandjohogololo shaNdobe moshitopolwa shaHangwena oya gandja omakwatho kaakalimo yomoshitopolwahogololo moka, ye li 60. 

Omakwatho ga gandjwa ogo omatalashe nosho wo uushako wuusila, kongushu N$15 000. 

Ta popi pegandjo lyomakwatho mOmaandaha, kamunsela gwoshitopolwahogololo shaNdobe, Hilaria Ndjuluwa okwa ti, nonando omakwatho ga gandjwa itaga kandula po oompumbwe dhaakalimo yomoshitopolwa she adhihe, oku uvite okashona hoka ombelewa ye ya longekidha, otaka ti sha. 

Ndjuluwa okwa yelitha kutya, mokuninga iigongi naakwashigwana yomoshitopolwahogololo she, oshigwana oshe mu tseyithile oompumbwe dhasho, onkene uuna ombelewa ye ya mona omakwatho okuza kaasamaria aamutimahenda, ohayi tala kudhimwe po dhoomompumbwe ndhoka. 

“Egandjo lyiinima mbika olyo eyamukulo koompumbwe dhoshigwana shetu. Otwa koneke lela kutya otu na aantu yetu ye li momikunda moka, ya pumbwa eyambidhidho. Nonando itatu mu yambidhidha amuhe oshita, otatu kwatha ngaa mpa tatu vulu, oshoka e ku pa okashona okwe ku hunga omwenyo,” Ndjuluwa ta ti ngaaka. 

Ta tsikile wo ta ti, ombelewa ye oya kala nokugandja omakwatho kaakalimo yomoshitopolwahogololo she, notayi tsikile nokushininga. 

Ndjuluwa ta tseyithile aakalimo yomoshitopolwahogololo she kutya ombelewa oye ya egulukila uuna taya pumbwa omakwatho, noyi ilongekidha okuninga omalongekidho gankene tayi ya kwathele. “Kwaamboka inaamu mona sha nena inamu tula othingo kepepe, molwashoka aantu ihaya pwile ko oshita. Oshikando tashi landula ko one tamu ka mona omakwatho goludhi nduka,” Ndjuluwa ta ti.  

Timoteus Ngilunanye, gumwe gwomwaamboka ya pewa omakwatho okwa pandula ombelewa yakamunsela keyambidhidho. 

“Otwa pandula kamusela pamwe naanambelewa ye komakwatho ye tu pe. Kalunga ne mu pe oonkondo natango, mu tu ningile oshindji shi vule po mpaka.” Nghilunanye ta ti ngaaka.

Omakwatho oga pewa aantu ya zi momikunda dha yoolokathana moshitopolwahogololo shika.


2022-05-27  Staff Reporter

Share on social media