New Era Newspaper

New Era Epaper
Icon Collap
...
Home / Ya teya nokuyaka okaketha ke na uushakashaka woN$12 pokakilinika 

Ya teya nokuyaka okaketha ke na uushakashaka woN$12 pokakilinika 

2020-04-16  Staff Reporter

Ya teya nokuyaka okaketha ke na uushakashaka woN$12 pokakilinika 
Top of a Page

Victoria Kaapanda

ONGWEDIVA-Nonande mboka yokuguma iinima yaantu kaashi li paveta taya tsikile okuyaka, monooli iimbuluma oya shuna pevi lela noonkondo pethimbo ndika lyoshilongo sha patwa, omolwa okukeelela omukithi gwoCovid -19.

Omugandji gwomawuyelele gwopolisi moShana Thomas Aiyambo okwa ti Etiyali lyoshiwike shika, okapangelo okashona komOngwediva oka li ka ponokelwa koombudhi, sho dha li dha yaka mo okaketha kiimaliwa hoka ka li ke na ashike N$12.
Ta ti oombudhi ndhoka odha li dha thigi dha tatula omakende getungo, moka ya pitile okuyuga mo okaketha kiimaliwa. Oya li ya thigi mo iinima yilwe inaye yi guma, mwa kwatelwa okompiyuta yopeke.

Ashike nande ongawo, Aiyambo okwa ti iimbuluma moshitopolwa oya shuna pevi lela, kakele komagumbo ngoka ga iteyelwa koombudhi mehuliloshiwike lya zi ko. Oshiwike ashihe sha zi ko inaya lopotelwa nande iimbuluma moshitopolwa shawo.
“Shika otashi ulike kutya omalovu ogo uupyakadhi, ogo haga longitha aantu iinima inayi uka oshoka ngeno okwa li oondingosho dha patuluka, ngeno kehe mesiku otamu lopotwa iimbuluma ya pita pu itatu,” Aiyambo ta popi ngaaka.
Omupopiliko nomugandji gwomawuyelele moshitopolwa shaHangwena Abner Kaume Itumba okwa ti oshitopolwa oshamwena nawa, kape na iimbuluma nenge iiponga tayi lopotwa.

“Onda koneke kutya omalovu nani ogo haga eta uupyakadhi, oshoka omalovu sho itaaga nuwa kapu na nando omuntu to uvu a tsuwa nombele nenge a dhengwa, shoka unene kwa li hashi ningilwa pomahala gomanwino,” Itumba a popi ngaaka.
Ta gwedhapo ta ti omukalo gwokupata oondingosho nani ogwa pumbwa okutulwa miilonga, go gu tsikilwe okulongithwa sigo aluhe oshoka ogwa shunitha iimbuluma pevi noonkondo.

Anna Kunga ha gandja omawuyelele gopolisi moshitopolwa shaMusati okwa ti iimbuluma moshitopolwa shaMusati oya shuna pevi lela, shoka tashi ulike ethano ewanawa moshigwana.  


2020-04-16  Staff Reporter

Tags: Oshana
Share on social media
Bottom of a page