OTJIWARONGO – Aantu yahamano oya li ya pi ya lunguna thilu kongulohi yEtitano moshiponga shi nyanyaleka sho okambetsa moka ya li ka li ka idhenge mumwe nohauto yiikoto iyali yo-GWM mondjila onene yaTjiwarongo naKalkfeld moshitopolwa shOtjozondjupa.

Omukwatakanithi gwomakonaakono giimbuluma mOtjozondjupa, Deputy Commissioner Naukalemo Andreas momapulaapulo noNampa okwa ti mombetse yoQuantum ndjoka hayi humbata aantu 16 omwa li mwu naaantu ye li 19 mwa kwatelwa omuhingi. Okwa ti oshiponga shika osha li sha holoka lwopotundi 23h40 mEtitano uusiku.

“Ombetsa oya adhika yu nuka kOtjiwarongo tayi zi koKalkfeld, omanga oGWM ya li tayi yi kombinga onkwawo,” ta ti ngaaka. 
Otaku popiwa kutya sho kun a ookilo 32 lwaampoka okuya mOtjiwarongo, okambetsa oka li ka ipumu moshinamwenyo, nomuhingi okwa li a kanitha okondolola yohauto, noya li ya puguma ee tayi yi kolulyo lwopate ee tayi idhenge mumwe nobaki, Andreas osho a li a fatulula ngaaka.

Okambetsa oka li kay aka omundilo naantu yahamano oya li ya sile mo, omanga yalwe 13 mwa kwatelwa nakuhinga ya li ya hupu niilalo. Aantu mboka 13, pamwe nomunamimvo 38 ngoka a li moo ye awike mo-GWM, oya li ya falwa koshipangelo kOtjiwarongo moka yaali konima ya li ya tuminwa koshipangelo oshinene shepangelo shaKatutura ongula yOlyomakaya. 
“Otatu pula moshigwana mboka ya li ye na iilyo yoofamili dhawo dha li tadhi zi komunkulofuta na inaya thika ya kwatathane nopolisi yaTjiwarongo,” Andreas ta ti ngaaka.

Okwa li a ti omakonaakono go-DNA otaga ka ningwa kwaamboka ya sa, onkene oshigwana osha pulwa shi ye komeho ya tongolole oonakusa. Omakonaakono gopolisi otaga tsikile.
-Nampa