Opolisi moshitopolwa shaShikoto oya tula miipandeko aalumentu yaali omutenya gwEtiyali mOndangwa, sho ya andhika nomahooli oshowo iikolitha inaayi pitikwa moshilongo.

Sha ikolela kepeko lyopolisi ongula yEtitatu, aalumentu yaali oya mangwa nomahooli oshowo iikolitha inaayi pitikwa moshilongo, momudhingoloko gOnethindi. Otaku hokololwa aafekelwa mboka yaadhika taya landitha omahooli ngoka taku fekelwa gaza puushiindalongo poAngola, hoka aanamibia oyendji yaningi omina, omolwa ondando yomahooli ga londa moshilongo.

Opolisi ndyoka kwa li ya nothelwako kutya opena omahooli taga landithwa, oya li ya pondola okumanga po omandini kaagena sha geli 239, omandini genasha geli 86, uuwiska wuli 280, noshimaliwa koomuma sha konda N$14 000.

Esiku olyo tuu ndyoka, opolisi moshitopolwa shOhangwena oya mangapo omufekelwa aandhika nomahooli. Opolisi oya popi kutya oshitopolwa shOhangwena, osho hashi pitile omahooli inaaga uuthwa moshilongo, nonando opolisi ya kala nokunkondopaleke ekondololo lyomahooli kaaga pite geye moNamibia.

‘’Otwa kambandhala okukeelela noku hulitha po omaupyakandhi goludhi ndoka, ihe oshigwana inashi hala okuuvako,’’ opolisi tayi ti ngaaka.

Okwa ndhindhilikwa omahooli ngoka haga landwa unene kaahingi yootekisa oshowo mboka haya hingi oondjila oonde.

“Iipotha yina sha neyako lyomahooli itayi ka talika ko we onga iipotha iishona na otayi ka ungaungwa nayo lela neitulemo,” ya popi ngaaka.

Tayi kumagidha oshigwana shi ikaleke ko kule nokukutha ombinga miiningwanima yi li ngaaka.

Omahooli oga konekwa taga landithwa unene miitolwa yokonooli, Omusati, Oshana osho wo Ohangwena. Epangelo lyaNamibia olya ndhindhilike kutya omahooli ngoka taga landithwa moNamibia okuza koAngola, otaga shunitha oongeshefa dhomahooli moshilongo pevi.

“Aahingi yiihauto otaya tondokele komahooli ngoka oshoka anuwa oge na ombiliha, omanga aashingithi yomahooli moshilongo itaaya landitha we,” tayi ti ngaaka. vkaapanda@necp.com.na