Aantu yaali oya ehamekwa moshiponga shohauto, sho iihauto iyali ya idhenge moshikoto shololi sha li sha thigwa mopate koongulasha dhEtiyali.

Sha ikolela kuuyelele wa gandjwa komukuluntu gwopolisi moshitopolwa shaShikoto Armas Shivute, aantu ye li yaali okwa li ya mono iiponga.

“Ololi ndjoka okwa li tayi hingi yu uka kOshivelo, sho ya li ya thikamekwa kohauto ya li konima yayo. Omuhingi gwohauto anuwa okwa lombwele gwololi kutya okwa gwitha etaiyela,”ta hokolola ngaaka. Ta ti, omuhingi gwololi sho kwa li ngeno a tanauke a shune konima, etemba lyokonima okwa li lya kakatele mopate, moka kwa li lyakala uusiku awuhe. Otaku hokola kutya obetsa yoIveco ndjoka ya li tayi zi kombinga yOshivelo, yehangano lyoSilas Ndapuka okwa li ya idhenge moshikoto moka.  “Omuhingi gwombetsa okwa li a mono oshiponga kashona nonando a li a nyengwa okuza mo. Okwa li a pondolwa okukuthwa mo kwaamboka ya thiki tango poshiponga,” ta ti ngaaka.

Shivute ta ti, aafaalelwa mboka ya li yatatu mombetsa kakwa li ya mona oshiponga.

“Natango ohauto yoToyota Corola okwa li yi idhenge moshikoto moka, moka omuntu gumwe kwa li a mono oshiponga,” ta ti ngaaka. 

Aantu mboka okwa li ya ka mona uuhaku koshipangelo shOmuthiya.

Moshiningwanima oshikwao, aantu ye li yatatu oya li ya ka mona uuhaku koshipangelo shepangelo shaTsumeb Lombard Omaandaha sho ya li yagu nombetsa pokandundu kaShomeya.

Sha ikolela kuuyelele wa gandjwa natango komukuluntu gwopolisi mOshikoto Shivute okwa ti, oshiningwanima shoka osha holoka komatango potundi 17h30.

Otaku hokololwa kutya omuhingi gwokambetsa hoka ka li ka humbata aafaalelwa taya zi kOmbaye, a li a ka nyengwa okupangela   ohauto, e tayi yi omuthenu oshoka mopate anuwa okwa li mwa ndondelwa omahooli.

“Okambetsa hoka kokaQuantam oka li ka gu ko kopate, ee taka galangata ko lumwe, shoka sha li sha etitha aafaalelwa yatatu ya ehamekwe,’ ta ti ngaaka.

Shivute okwa ti, elago enene kakwa li ku na ohauto tayi zi koombinga adhihe pethimbo ndyoka. Aantu mboka ya mono oshiponga oye li monkalo ohwepo, omuhingi ina mona oshiponga. 

– vkaapanda@nepc.com.na