OMUTHIYA – Omwaalu gwaantu mboka ya sile moshiponga shohauto mOlyomakaya pokati koTsumeb nOtavi, shoka sha li shi li pokati kohauto yiipundi iheyali noFord Ranger yonomola yaAngola ogwa ya pombanda okuza paantu yane gwa ya paantu yatano. Nguka ogwa londo sho gumwe a adhika ta falwa koshipangelo shMedi-Park mOngwediva.

Mboka ya sila moshiponga shika oya li ya tongololwa onga okanona koomvula ndatu Linyondi Azariah Luke. Yina yokanona haka Helen Domingo, 24, namumwayina Martha Maranada Tjapewa, 1, Mainjongo Mavis Handura, 23, nomuhingi Hendrick Mandume Ndivayele, 24.

Aafaalelwa yaali Theorich Damaseb naUerikua Hengari natango otaya mono epango moshipangelo shaTsumeb, pamwe naamboka yatatu ya li mohauto yoFord Ranger, Figueira Quinemuna Camburo, Antonio Califunga nomuhingi Jose Mendes Sambuanda.

Opolisi yaShikoto otayi ti oohauto ndhika mbali odhi idhenge mumwe oshipala noshipala konyala ookilometa 30 kondje yoTsumeb mondjila ndjoka yu uka kOtavi. Otaku popiwa ohauto yoToyota ya adhika tayi zi koTsumeb yu uka koWindhoek

Ehuliloshiwike ndika lya zi ko olya li lyu udha iiponga, shotango osha li sha holoka pokati koKalkveld nOtjiwarongo, moka aantu 14 ya sila mpoka, iiponga iikwawo itatu oya holoka pokati KOutapi nOshakati, shimwe omoWindhoek noshikwawo osha li koWalvis Bay. Aahingi yaali yomiiyenditho ya li miiponga oya li ya mangwa po shi na sha nokuhinga ye li kohi yodhungo notaya mono epango ya kalelwa kopilisi.