New Era Newspaper

New Era Epaper
Icon Collap
...
Home / Yatatu ya monithwa oshiponga nondjembo

Yatatu ya monithwa oshiponga nondjembo

2019-08-08  Nuusita Ashipala

Yatatu ya monithwa oshiponga nondjembo

ONGWEDIVA –Opolisi mOmusati oya patulula oshipotha shonkambadhala yedhipago sho omulumentu gumwe molukanda Oshipambu moshikandjohogololo shaAnamulenge a patulula omulilo nokumonitha aantu yatatu oshiponga kongulohi yEtiyali.  

Omufekelwa ngoka natango ta kongwa kopolisi, okwa matuka po nokuthiga po ehala, konima yokulonga iilonga ye yiihuna. 

Ondjembo yoludhi lwo12GA ndjoka ya longitwa oyi li momake gopolisi.  
Omukwatakanithi koshikondo shokukonaakona iimbuluma mOmusati, Deputy Commissioner Moses Simaho okwa ti iihakanwa yomufekelwa nguka mbyoka ya ehamekwa lwiikando oya li ya falwa koshipangelo shepangelo kOshakati, hoka yaali natango ye li moombete, omanga omutitatu a lalekwa. 

Natango tuu mOmusati, opolisi otayi konaakona oshiningwanima shoku ehamaka omuntu kolutu nelalakano oku mu monitha oshiponga konima sho omukiintu a li ponokelwa kOshikuku.
Simaho, okwa ti oshiningwanima shika oshinyanyalithi osha ningilwa molukanda Uutuntu.

Otaku hokololwa omufekelwa a dhengagula omukiintu nguka lwiikando oyindji moshipala e te mu thanga meho lyokokulyo e ta gwile pevi. 

Omukiintu nguka anuwa okwa mona oshiponga noonkondo. 
Omufekelwa ngoka e shiwike anuwa okwa li a kolwa pethimbo lyokulonga iikulumanene. Ina kwatwa po natango.


2019-08-08  Nuusita Ashipala

Tags: Oshana
Share on social media