Omukuluntu gwoshikondo shuundjolowele moshitopolwa shaShana Johanna Haimene okwa ti, aantu yeli 103 oya ikalekelwa moshitopolwa shaShana, mo mahala ga yooloka.

Omahala ngoka oga kwatela mo Ondangwa Town Lodge, RDC Ongwediva, Untag Lodge oshowo moRochas Hotel.
Aantu ashike yeli 103, ya ikalekelwa moshitopolwa shaShana nkene omukithi ngoka gwa ponokele Namibia, moka mwa lalekwa aantu yeli 27 no ngaashingeyi omuna aantu yeli 76, ihe inamu monika nando omuntu gumwe ena omukithi gwoCovid-19.
“Aantu mboka ya ikalekelwa momahala moka, oomboka unene haya shingi omaloli oku za kondje yoshilongo oshowo mboka ya za komahala kuna iipotha yili pombanda. Oyendji oya za koAngola oshowo kOmbaye,” Haimene ta ti ngaaka.
Okwa fatulula ta ti, aantu mboka ohaya ikalekelwa omasiku geli 14, noha ya ningilwa omakonaakono kehe esiku. Okwa gwedhapo ta ti, omwaalu ngoka a gandja ohagu lunduluka kehe ethimbo oshoka o pena yamwe taye yamo,  po o pena mboka taya lalekwa mgele ya manako omasiku gawo.

Haimene okwati, sigo onena oyena omahala gwokwiikalekelwa ga gwana oshoka aantu kayeshi oyendji natango. “Otuna omahala inaga longithwa sigo onena,” Haimene a popi ngaaka.
Agwedhapo ta ti, oya mona natango omahala gaa mboka taya kamonika omukithi ngoka, Bennies park, Oshakati Guest House, Oshandira oshowo Etuna Guest House.  

Kombinga yomakwatho giilongotho, okwati omanga yena iifudhitho inene yili itatu, oya gwana manga. Oyeshi oku pandula oshoka natango ka yeli muupyakadhi noku indila omakwatho.
“Omakwatho pethimbo ndika naga ukithwe koshitopolwa shErongo hoka kuna iipotha tayi londo kehe esiku. Itandi ti, itatu ka pumbwa omakwatho, ihe otatu kega indila uuna nase twa mono twa uka nenge twa thika muupyakadhi,” Haimene ta ti ngaaka.
Haimene okwati, kehe ngoka taka mona ena omadhidhiliko gafa ngoka gwomukithi  gwoCovid-19, na kale athika poshipangelo nenge adhenge ongodhi opo a mone ekwatho lyomeendelelo.

Omukithi ngoka ogwanika oshiponga oshoka ohagu taambathanwa meendelelo onkene oshasima gu keelelwe kaa gu taandele.
Okwa kumagidha oshigwana shi dhiginine omilandu oshowo omalombwele ga tulwapo okukeelela omukithi gwoCovid-19.
Ta ti, kehe gumwe nakale a zala okamask, na pukale omahala pokati komuntu nomuntu. Ta ti aantu naya ikohe koonyaala ethimbo kehe.