Okwa didilikwa ovalihongi va ninga oihakanwa yokutulwa mokatoo modoolopa yEenhana eshi hava kanifa omaliko avo.

Edi oda popiwa komupopiliko wopolifi moshitukulwa shaHangwena, Warrant Andreas Nghiyolwa onghela.

Meenghundana a ninga naKundana, okwa ti opolifi oya lopotelwa oibofa ya yooloka yovalihongi hava tulwa mokatoo.

Okwa ti unene tuu ovalihongi ovo vape modoolopa yEenhana nove li momudo wavo wotete koshiputudilo shopombada ohava tulwa noupu mokatoo.

Nghiyolwa okwa ti ovalihongi ohava tulwa mokatoo ngaashi okulombwelwa kutya ope na onhele tai yandje oilonga, okushakeneka novanhu keembaanga tava pulwa opo va ka fatulule.

Okwa ti ovalihongi vamwe ohava kanifa oimaliwa yavo tashi pitile mokukengelelwa ngeenge tava kongo eenduda yokuhiila.

Okwa ti omulihongi umwe okwa kanifa omaliko avo konima eshi a shakeneka nookalyamupombo ndele ta lombwelwa kutya ota pewa okawe ngeenge okwe va fatulile.

“Ovanhu ohava ve li ningifa kutya ihava popi oshingilisha ile oshiwambo nokonima ohava pula opo omulihongi kutya na fatulule. 

Ove hole okuningila oinima ei konima yomakuma,” ta ti.

Okwa hokolola ta ti omulihongi umwe okwa hekwa kovanhu vavali ndele ta lombwelwa kutya opena okafitola ta ka yandje ombelela kovalihongi.

“Okwa fiya po ondjato yaye muna okompiuta nokonima okwa hanga ovalumenhu ava va faduka po,” ta ti.

Okwa ti ovalihongi vamwe ohava kala va taalela omashongo oshimaliwa shokulanda oikulya ashike eshi itashi kutya nava ninge oihakanwa yokatoo.

Okwa kumaida ovaholingi opo va xulife po okuya meenghundafana novanhu vehe va shi.

-fhamalwa@nepc.com.na