Abraham Mwanyekange 

Omuprimaminista Elijah Ngurare okwa yandja N$5 000 okudja mondjato yaye kovanafikola dingi kofikola Okankolo Combined. 

Osho osha landula eshi ofikola yOkankolo kwa li ya mona omhito yokwiifana Ngurare pofikola nelalakano loku mu lombwela eemhumbwe dofikola yavo. 

Oima l iwa oya yandjwa mOmaandaxa oshivike eshi pofikola. Nonande fiyo opaife inava mona omakwafo oo kwa li va pula ngaashi ewedelo lomuhandjo wofikola, ova ti ove na ehafo lakula kwaasho va ningilwa kuNgurare. 

Omunafikola dingi odula ya dja ko oo e ya wotete mondodo onhiheyali fiyo 11, keshe umwe okwa pewa N$1 000. 

Elizabeth Abraham oo kwa li dingi mondodo onhi-10 odula ya dja ko okwa lombwela Kundana ta ti okwa nyakukwa eshi elihongo laye tali mu etele oinima iwa monghalamwenyo. 

Heralia Valombola ou naye e li dingi mondodo onhimuwoi okwa ti okwa pandula omupilima eshi te va tu omukumo. 

“Paife ohandi ka longa noudiinini melongo lange opo ndi ka mone omauwa komesho,” ta ti. 

Valombola naAbraham aveshe ova kumaida ovalongwa va kufe ko eenghaku opo navo ve shi endife nawa melongo. 

Omukulunhu woilongwa, pofikola Okankolo Combined, Jeremiah Alfeus okwa pandula omupilima Ngurare, ta ti ove udite etumba eshi ovaleli va tala yo nokeefikola odo di li komaushai. 

Alfeus okwa pula Ovasamalia ovanamumutimanghenda opo va kufe ko oshihopaenenwa shiwa sha longwa komupilima okuyambidida ofikola yavo. 

-abbenghilai@gmail.com