ONGWEDIVA – Omupopiliko wopolifi moshitukulwa shaShikoto Chief Inspector Ellen Nehale-Kangulu okwa ti ombelewa yaye oya didilika omwaalu muhapu wovashingi veetuwa hava faduka po konima ngeenge va eta oshiponga.
Onghee Kangulu okwa kumaida ovashingi veetuwa opo va xulife po okufaduka po komina yoshiponga molwaashi osha nyika oshiponga.
“Omushingi ngeenge ota faduka po otashi dulu okueta oshiponga molwaashi ota shingilile otuwa yaye noha kala a kwatwa koumbada,” ta ti.
Okwa ti omushingi wotuwa na kale e na oshinakuwanifa shokukwashipaleka kutya ota lopotele opolifi pefimbo konima yoshiponga.
“Osha fimana ngeenge oshiponga tashi lopotwa pefimbo opo opolifi novanailonga vouhaku va dule okufika poshiponga diva nelalakano okuyandja omayakulo kovanhu ve li moshiponga,” Kangulu ta ti.
Lwopokati opo, Kangulu okwa ti opolifi oya didilika ovanhu hava tavuluka opate ngeenge va kolwa osho shi li sha nyika oshiponga neenghono.
Onghee okwa kumaida oshiwana opo shi xulife po okutauluka opate shi li koshi yodungo molwaashi ngeenge omunhu a kolwa iha kala e wete ngeenge otaku di eetuwa.
Okwa weda po ta ti oshiwana nashi longelo kumwe nopolifi okuyandja ouyelele kopolifi unene tuu ngeenge kwa longwa oshimbuluma ile omushingi a faduka po.
– fhamalwa@nepc.com.na