Opolisi moshitopolwa shaHangwena oya patulile okamatyona komomvo 17 oshipotha shedhipago, ekwatokoonkondo noku kambadhala oku ya uuyuki moshipala, konima sho anuwa ka dhipaga omukiintu gomimvo 44, omanga inaa ekelahi olutu lwe momuthima gwomeya.
Omukuluntu konakoni gwiimbuluma moshitopolwa shaHangwena Inspector Victor Haludilu okwa ti, oshiningwanima shoka osha holoka lwopotundi 20h00 mOmaandaha, momukunda Omunyekadi moshitopolwa shaHangwena. Ta ti, opolisi kayi na uuyelele wekwatathano lya li pokati kaantu mboka yaali.
Haludilu okwa ti, kamatyona ngoka okwa li a matuka po konima sho a longo iilonga mbyoka yi nyanyaleka, ashike okwa magwa kopolisi ongula yEtiyali. “Omulumentu ngoka okwa li a mangelwa komukunda Ohaukelo ngoka gu li ashike ookilomita 10 okuza mpoka pwa ningilwa shinigwanima,” ta hokolola ngaaka. Ta ti, omukiintu ngoka anuwa okwa li megumbo nanona yomimvo omishona taya teleke uulalelo.
“Okwa li anuwa a zi po pelugo ayi mondunda, aanona anuwa okwa li yuuvu yina ta popi mondunda, ta tumbula edhina lyomufekelwa, ta ti nazemo mondunda ye,” ta popi ngaaka.
Haludhilu ta ti, omukiintu ngoka okwa li igidha aanona yaka ithane aashinda opo ye ye ye mu popile.
“Aanona yamwe mboka ya li ya kala po, okwa li yuuvu yiina ta kugu, sho ta dhengagulwa. Omolwa uumbanda, aanona mboka ya li ya hugunine megumbo okwa li ya matuka po,” Haludhilu ta hokolola.
Ta gwedha po kutya sho aashinda ya lombwelwa okwa li ya lopotele opolisi, ndyoka ya li yaadha mondunda moka kaamuna aantu.
Ta ti, opolisi sho kwa li ya landula oompandhi, okwa li yaadha pehala limwe puu na ondambo tapu fekelwa kutya opo kwa li a kwatelwa koonkondo, oshoka opwa li pwa adhika natango uumbangi wumwe tau ulike kutya omukiintu ngoka okwa li a kwatwa koonkondo tango. Natango okwa lopotwa kutya mothingo yanakusa otamu ulike a li ta pondwa.
Nakusa ka kwa li ta vulu okutumbulwa kedhina manga. Okwa li a yambukile momukunda Omunyekadi moshitopolwa shaHangwena. Omakonakono gwopolisi oge li metifa.