Omulumenhu weedula 34 okwa fya eshi vati eli tetaula nomakende lwopotundi 17h00 komukunda Onambaba moshitukulwa Ohangwena.
Nakufya okwa tongolwa oye Benedictus lishuna Hiilila a dile komukunda Outwilo mOhangwena.
Omukonakoni woimbuluma wopolifi moshitukulwa shaHangwena Deputy Commissioner Zachria Amakali okwa hokolola ta ti omulumenhu okwa fiya xe meumbo efimbo longula ta ti kutya ota i kukaume kaye.
Vati okudja opo mboli okwa ya moixwa ndele ta kufa omakende ndele te a tatula nokutameka okuli teta mofikongo, meemhati, komaulu nokeenyala fiyo ta xulifile ponhele opo.
Konima eshi xe a mona kutya okwa kwatwa efimbo lile oku alukila keumbo okwa lopotela opolifi nokonima opolifi oya shi kula eemadi daye fiyo oponhele opo a hangika a xulifila.
Opolifi oya hokolola tai ti omulumenhu okwa didilikwa a kala shito ha hangika komhepo yokulikufa omwenyo ashike ovakulunhu vaye ova kala nokuninga eenghendabala nokumuyambidida.
Hiilila ina fiya po omukanda tau yandje ouyelele kutya omolwashike uli diapela, po kapena omunhu ta fekelwa mekwatafano lefyo laye.
Omakonakono opolifi otaa twikile kombinga yoshikumungu eshi.
Opolifi oya kunghilila oshiwana opo ngeenge sha didilika ovakwapata vavo tava u like ve na omadidiliko okulikufa omwenyo opo va ninge omalongekido diva okuyambidida omunhu oo.