Omuhingo gwoshihauto gwomimvo dhopokati, okwa li iimangeleke konima yositola Woermann brock mOshakati mehuulilo shiwike, kinima yoshiponga shoka sha faalele oomwenyo daantu yane noku lemaneka yatano.

Omupevikuluntu gwopolisi moshitopolwa shaShana Deputy Commissioner Hilya Haipumbu okwa li a koleke kutya olutu lwomulumentu ngoka taku tiwa oye Nelso okwa li lwa monika esiku lyalandula oshiponga.

Omupopiliko gwopolisi moshitopolwa shaShana Warrant Officer Frieda Shikole okwa ti, oshiponga shoka osha li sha ningwa mokati kuusiku oku pendukila Etine, mepandaanda Maria Nakuumba- okatana-Okahao mOshakati.

Otaku hokololwa omuhingi ngoka a pumu aayendi yokolupadhi yatano, mboka yane yomuyo aakiintu yatatu nomulumentu gumwe ya hulitha, e taya hulithile pehala mpoka. Mohauto moka omwali mu na aafaalelwa yane, mboka nayo ya mono iiponga. Luhupe gwomaayendi yokolupadhi naafaalelwa okwa li ya tambulilwa moshipangelo shaShakati monkalu ombwiinayi. 

Opolisi oya patulula oshipotha shedhipago kaali shi lyoshiningilawina, oshipotha sho kuza pehala lyoshiponga omuhingi inaa konaakona onkalo yoonakuehamakwa noku matuka po ehala lyoshiponga.

Ohauto ndjoka ya eta oshiponga yoToyota double-cab yolwaala olusilver, otaku hokololwa ya ehama noonkondo kombinga yokolulyo. Omuhingi okwa li eyi thigi pehala lyoshiningwanima sho a matuka po. Opolisi okwa li ya yelitha kutya aafalelwa mboka ya li ye li mohauto moka oya li ye li monkalo tayi limbililike.

Shika osha ningwa ashike omasiku omashona, sho okanona komimvo heyali ka li ka lyatwa nokusa ethimbo olyo tuu ndyoka, posikola Charles Anderson mOngwediva, moshitopolwa shaShana. 

Oshiningwanima shoka okwa li sha holoka moshanga shomutenya, konima osikola ya pita mo.  Okanona hoka kedhina Simon Tangomwene Hamunyela nooyakwao oya adhika owala ya ilwa ko kosikola kuhe sho oshiponga sha ningwa.

Sha ikolela ku Toivo Hamunyela, he yokanona, sho a thiki posikola, okanona ke opamwe naukwao oya londo mohauto. 

Ashike ye (he) okwa kwatwa kenota ndjoka lye mu thiminike opo a ka konge omeya molugumbo lwosikola.  “Omanga inaandi thika po pomba yomeya, onduuvu ashike oshinima sha inyenga, sho tashi kookololwa kohi yohauto, nani okanona kandje,” ta popi nomahodhi taga mbomboloka. Ta ti, mokushuna okwa li a tsakanekwa kuunona wosikola tau tondoka tau igidha kutya Tanga a lyatwa. – vkaapanda@nepc.com.na