Aakalimo yomoshitopolwa shaShikoto momudhingoloko Okatope oya mono ombelewa yelelo lyopamuthigululwakalo oshiwike sha zi ko.

Ombelewa ndjoka oyi li momukunda Onandjamba noya li ya patululwa pambelewa Etine lya zi ko.

Mwene gwomukunda Onandjamba Jerry Kambala esiku ndyoka okwa li u ulike enyanyu, ta popi ta ti, ombelewa ndjoka itayi ka gandja ashike omayakulo kaanamukunda ye, ihe nokomikunda ndhoka ndhi li popepi. “Aantu oyendji ohaya ka mona omayakulo gopamuthigululwakalo kOndangwa, shoka hashi pula natango ethimbo noshimaliwa okuthika hoka,” ta popi ngaaka.

Ta popi kutya, aakalimo yomomukunda muka oshowo omikunda dhopopepi okwa li haya longitha oshimaliwa sha thika N$70 okuthika kOluno, ihe okuza nena otashi ka hula,” ta popi ngaaka. Ta ti, shika otashi ulike lela kutya epangelo olyi na ohokwe nelalakano lyoku eta omauwanawa popepi noshigwana shetu. “Otse aanelago, otatu gandja olupandu komukwanilwa nomalenga ge sho ya dhimbulukwa oku eta omayakulo popepi natse, ondjokonona ndjoka tayi ndhindhilikwa sigo aluhe momukunda gwetu,” ta pandula ngaaka.

Kambala ta gwedha po kutya shika natango otashi ka shonopaleka omikweyo oshowo omangundumano poombelewa oonkulu, oshoka aantu otaya ki itopola.

Mwene gwomukunda Uukwanambwa Gerhard Kambonde esiku ndyoka naye okwa li a popi kutya ombelewa ndjoka otayi ka longithwa kaakalimo ayehe ye li kohi yelelo lyOndonga.

“Ondi inekela ombelewa ndjika otayi ka gandja omayakulo agehe ga pumbiwa kaakalimo oshowo otayi ka kwatelwa po pamukalo omuwanawa opo natango yi ye, yi longithwe monakuyiwa,” ta ti ngaaka.

Ombelewa ndjoka okwa li ya patululwa tango komukwanilwa Fillemon Shuumbwa Nangolo mo2021, sho etungo kwa li lya pu okutungwa, ihe omolwiilongitho yomeni kaaya li po, osha li sha imbi lyi tameke okulongithwe.