Home / Aakalimo poRosh Pinah Inaya Hala Okufuta Omayakulo gaMuni Aakalimo poRosh Pinah Inaya Hala Okufuta Omayakulo gaMuni
"WINDHOEK Aakwashigwana molukanda Tutungeni poRosh Pinah inaya nyanyukilwa etokolo lya pitithilwe kelelo lyokandoolopa hoka ndyoka tali ya thiminike ya tameke okufuta omeya nomayakulo galwe, konima sho omayakulo ngoka monakuziwa ya kala haye ga pewa oshali. Molukanda olukulu moka aakwashigwana mbaka ya k ala nokudhengela oombashu dhawo olu li mehala lyomina yaRosh Pinah nokwa li lwa tungilwa unene popepi momaupyakadhi taga zi miiyekelwahi okuza momina. Kakele muFebuluali 2006, ewiliko olya koneke onkalo ndjoka yokwaanuundjolowele nolya tokola okutembudhila omagumbo ngoka kehala lyedhina Tutungeni. Olukanda Tutungeni, inalu fa ngaashi okulanda ndoka olukulu, oshoka olukanda nduka olwa longekidhwa nawa nomahala oga tendwa, omu na omapandaanda, uundjugo woshigwana oshowo uupomba womeya ; iiyakulitho mbyoka ya kotha oomina dhika mbali okapandi koomiliyuna mbali. Okampani yopaumwene yedhina RoshSkor, oya kutha ko oshinakugwanithwa shegandjo lyomayakulo kaakalimo yomolukanda Tutungeni pakutula mo omayakulo ngaashi uundjugo, egongelo lyiiyagaya oshowo omeya gokopomba. Aakalimo yomuTutungeni ngashingeyi otaya pulwa ya fute N$6.35 moolita dhomeya 1000 oshowo N$50 dhi nasha nomayakulo galwe, ngoka aakalimo ya ndopa okufuta. Omukalo gokugongela ko iimaliwa yomayakulo ngoka ogwa ninga omukundu omunene omolwomayakulo inaga futwa kaakalimo. Kakele nelalakano okukandula po omukundu nguka ehangano ndika RoshSkor olya eta po uupomba womeya wokakalata mboka wa tulwa pomahala gayooloka molukanda naashika osha kutha po okapandi koodola N$291 000 nelalakano okugalulila po oshimaliwa shomayakulo ngoka ga longithwa kaakwashigwana. Uupomba womeya owa pwile okulongwa muNovomba 2007. Ihe pethimbo lyefudho lyaDesemba omvula ya zi ko, aakwashigwana yamwe oya yonagula po uupomba womeya wu li 23 womuupomba 24. Ewilikongundu olya tokola kutya omawapekululo otaga vulu ashike okulongwa uuna oshigwana shi ilongekidha okukutha ko uumwene wuupomba mbuka womeya. RoshSkor okwa tula po uupomba une pehala limwe ndyoka lya gamenwa notau wilikwa koRoshSkor. Pauyelele waAndries Aspara, Omunambelewa omukuluntu mOndoolopa ndjika yaRosh Pinah, aakwashigwana oya yonagula po uupomba mboka shoka itaya tsu kumwe nelongekidho ndyoka lya tulwa po. ""Aantu kaya li ya nyanyukilwa uupomba mbuka womeya haga futwa omanga omuntu ina tameka okuteka ko omeya, oya hala ashike omeya gopunyu,"" Aspara ta ti. Okwaauvanawa mokati kaakwashigwana okwa etitha wo ehololomadhiladhilo, ndyoka lya ningilwe eti 18 Januali nuumvo, nonando opwa ningwa oonkambadhala koRoshSkor okuninga iigongi naakalimo okuyelitha iifuta yomeya nomayakulo galwe kaakwashigwana. Oshigongi osha ningilwe pokati kaakalelipo yaali, aakwashigwana okwa li ya kalelwa po kuKansela gOshitopolwahogololo Oranjemund, Toivo Nambala. Osheendo shoka sha kalelwa po kuKansela Toivo Nambala osha totha mo ompumbwe yokwaaneuvoko lyomukalo gokuyalula iifuta yaRoshSkor kaakwashigwana ongoshitsa shoka she etitha uupyakadhi, nonando oonkambadhala odhindji odha ningwa okundungika nokuuvitha ko oshigwana kombinga yoshinima shika. Oonkundathana dhi nasha nomakandulopo gomikundu ngoka taga vulu okuningwa po noondungethaneko dhiilonga odha tulwa miilonga. Nambala ota ti, osheendo she osha zimina okwaafuta oshimaliwa N$50 shomayakulo komwedhi, kakele omeya otaga kala nokufutilwa ngaa oshimaliwa shago N$6.35 moolita 1000 dhomeya, oshowo uupomba womeya haga futwa tau ka tulwa pomahala galwe ngele aakwashigwana oya tokola okuhulitha po iilonga yomuyonena hayi ningilwa uupomba womeya. Okakomitiye kokukalela po aakalimo yomuTutungeni oke na okutotwa po ka longele kumwe nokomitiye yoRoshSkor opo ku kongwe iiyetwapo nkene omayakulo ge na okukala taga futwa. Oshizemo shokomitiye yiilonga osha pumbwa okumanithwa momasiku 31 Maalitsa nuumvo. Kansela Nambala yemwene ota ka kwatela komeho moshinima shokukonga ekandulopo lyomukundu. ""Oshigwana kashi na uupyakadhi wokufuta pethimbo ndika. Ihe otaya ti iimaliwa oyindji noonkondo naashika osho she ya ningitha kaa ya fute. Oya hala iifuta yomayakulo yi topoke kiifuta yomeya,"" Kansela ta ti. Otashi ka kotha oRoshSkor okapandi koodola N$291 000 okuwapekulula uupomba mboka wa yonagulwa. "
Your experience on this site will be improved by allowing cookies.
