Home / Aakalimo yomOlukonda Ya Mona Omauthemba gOmapya Gawo Aakalimo yomOlukonda Ya Mona Omauthemba gOmapya Gawo
"OLUKONDA Oshiningwanima shopandjokonona osha ningwa momasiku 30 Juni nuumvo, sho Epangelo lyaNamibia lya gandja oshikando shotango oonzapo dhomauthemba gomapya/omavi kaakalimo yomOshikandjohogololo Olukonda moshitopolwa Oshikoto. Egandjo lyoonzapo 1 000 kUuministeli wOmavi nOmatulululo olya etitha wo ehulithopo lyoprojeka yomalolelo ndjoka ya ningwa okunyolitha aakwashigwana ya mone omauthemba ngaka oshowo uukaalita womikunda dhawo wa thanekwa okuza mombanda mOshikandjohogololo Olukonda. Oprojeka yaLukonda ndjoka ya tamekele kuyele muMaalitsa oya li yopamuhanga pokati kuuministeli womavi oshowo omahangano omagandjishali - European Commission ndjoka hayi gandja oshimaliwa kOproholama yEshunithopevi lyOluhepo mIitopolwa yokOmikunda (Rural Poverty Reduction Programme - RPRR) oshowo Ombaanga yOmapendulopo yaNdowishi. ""Oshituthi shika oshopandjokonona lela,"" osho Ominista yOmavi nOmatulululo, Alpheus !Naruseb ta ti pehulilo lyoshituthi. ""Olukonda ogwo omukunda gwotango tagu sindana mokumona omauthemba agehe gevi lyopamuthigululwakalo moshilongo ashihe,"" Naruseb ta ti kengungo enene lyaanamukunda 60 lwaampoka mboka kwa li ya gongala mosaala yawo okutyapula oshituthi shika. Mokati kawo omwa li Kansela gwOpashitopolwa, Phillemon Ndjambula, Elenga enene lyomElelo lyaNdonga lyOpamuthigululwakalo, Boas Mweendeleli ngoka wo a kalele po Omukwaniilwa gwaNdonga, tatekulu Immanuel Kauluma Elifas. Oveta yElundululo lyEvi lyOmiitopolwa yaayehe yomumvo 2002 otayi ti omuntu kehe ngoka a kala nuuthemba wokukala nepya/evi lyokulonga uunamapya nenge evi ashike a tunga egumbo/olukalwa, omanga Oveta inayi tameka, oku na okuninga eindilo a mone uuthemba/onzapo yevi/ehala ndyoka andola omanga omwedhi Febuluali 2009 inagu sa. !Naruseb ota ti opwa kala ompumbwe okuninga omainyolitho gwoludhi nduka ge li nawa nomelandulathano, noprojeka yomOlukonda oya gandja oshiholelwa oshiwanawa shoka shi na okulandulwa. ""Osha yelela nawa uuministeli kutya iigwana/aakwashigwana yamwe inaya tseya sha kombinga yOveta ndjika.... Oshi li oshidhigu shili okulonda kondundu ndjika onene ihe otatu ka pumbwa eyambidhidho methimbo ndika,"" !Naruseb ti indile. Kakele koonzapo ominista oya gandja wo uukaalita womikunda (village maps) dhimwe kooyene yomikunda. Mokupopya poshituthi shoka, Omuambasanda gOkomisi yaEuropa moNamibia, Elizabeth Pape okwa tsu omuthindo eyambidhidho lyOkomisi ndjika kooprojeka dhoka dha pumbiwa noonkondo kAanamibia. ""Noshimaliwa shaafuti yoompale yiilongo yUukumwe waEuropa, otwa hala okukwathela ooproholama moka Epangelo li na mo oshipambu notadhi shilipaleke omapendulopo taga kalelele. MoNamibia, Epangelo pamwe natse otwa tokola okukwatha iikondo iyali ya simana - elongo nomapendulopo gokomikunda,"" Pape ta ti. Shi nasha nomapendulopo giitopolwa yokomikunda Okomisi yaEuropa ohayi gandja okapandi koomiliyuna omathele gatano nomilongo ndatu (N$530 million) kOproholama yEshunithopevi lyOluhepo mIitopolwa yokOmikunda, moka eyambidhidho li nasha nelundululo lyevi li li oshipambu oshishona lela hashi mono ooN$40 million lwaampoka. ""Atuhe otwa koneka kutya esindano lyelundululo lyevi oshinima sha simana kuuhupilo/emona nonkalo yopapolotika moNamibia. Elundululo lyevi otali ka dhana onkandangala onene yopauyuuki oku shi talela muumwene wevi mboka tau ka kumika elongitho lyevi nawa okwiimonena iikulya ya gwana oshowo iiyemo uuna iilandithomwa yopaunamapya ya tumwa pondje yoshilongo,"" Pape ta ti. Ndjambula naMweendeleli oya holola omaiyuvito ga faathana naangoka ga!Naruseb. Ndjambula ota ti: ""Okumona omakandulopo gomikundu ga hugunina koompumbwe dhevi, otwa pumbwa oonkambadhala dhopamuhanga, uuyuuki nokutotha mo iitegelelwa ya yela okuhogolola aantu mboka ye na okutulululwa."" ""Aantu oyendji oye na ohokwe okupendula po iitopolwa yawo unene ngashingeyi sho ya pewa omauthemba ngaka,"" Mweendeleli ta ti. ""Oprojeka ndjika okwa li ya enda nawa nondi ineekela shika otashi ka tsikilwa nasho miitopolwa yilwe,"" ta ti. Oprojeka tayi landula ko yeinyolitho lyomauthemba gevi lyopamuthigululwakalo okwa tegelelwa yi ka ningwe niitopolwa yomOmusati noCaprivi. "
Your experience on this site will be improved by allowing cookies.
