Minista gwomayambulepo goondoolopa nuushayi Erastus Uutoni okwa ti aaleli melelo lyondoolopa Oniipa ngele itaya longele kumwe otaya ka taalela uupyakandhi wuuyogoki methimbo ehupi.

Uutoni ndhoka okwe endhi popi esiku kwa li ta gandja omahala pambelewa gokutungwa omagumbo kaakalimo yomOniipa.

“Oshigwana osha hala omahala, ihe omaipumomumwe gaaleli ogo taga imbi aantu ya mone omahala,” ta ti ngaaka.

Ta ti, aaleli yeli moombelewa naya gwanithe po iilonga yawo ihe haku nyenyeta.

“Moombelewa omulimo ashike omimvo omishona e tamu dhi thigi po, onkene longeni neyitulemo oshowo nelalakano,” ta popi ngaaka.

Uutoni ta ti, mpoka kaapu na elongelo kumwe ihapu holoka ehumokomeho.

Ta fatulula kutya ehumokomeho ohali holoka ngele aaleli taya longele kumwe nombili nonelandulathano.

Minista esiku ndyoka okwa ti omahala ngoka a gandja pambelewa okwali ga tulwa miilonga melongelo kumwe nehangano lyoMTC, elelo lyOniipa oshowo ehangano lyokuyambulapo oondolopa tali ithanwa Development Workshop Namibia (DWN).

“Epangelo otali tsikile okulongela oshigwana shaNamibia uuwanawa pamukalo gomayakulo agehe  oshowo okuandjaneka omalukalwa,” ta ti ngaaka.

Omukuluntu gwehangano lyoMTC Licky Erastus okwa ti oya shaina uukume nehangano DWN kohi yoshipalanyolo MTC Land Delivery Project.

“Shoka okwali twe shi ningi nelalakano lyokuhumitha komeho oshowo okuyambula po ondoolopa moshilongo oshowo okuyambindhindha oshigwana shi mone omalukalwa,” ta fatulula ngaaka.

Ta gwedha po kutya natango oyeshi ningi oku tsakaneka noku yambindhindha epangelo.

Erastus okwa a totha mo omayakulo ngoka ehangano lyawo lyoMTC lya lyayambindhindha sigo ompaka melongelo kumwe noDWN.

- vkaapanda@nepc.com.an