Aanilonga yelelo lyondoolopa yaShakati oyi ipyakidhila okulongekidha ehololo madhiladhilo lyopambimbili, ya hala oondjambi dhawo dho komwedhi dhi gwedhelwe.

Otaku hokololwa kutya oya ningi oomvula dha pita pundatu oondjambi ndhawo inaadhi gwedhelwa.

Omupopiliko gwelelo lyondoolopa Katarina Kamari okwa ti, ke na natango uyelele wa gwana kombinga yekanka onkene ita vulu okutya ko sha.

“Itandi vulu okupopya sha kombinga yekanka pethimbo ndika, oshoka kandi na uyelele kutya ota li ningwa uunake na ota li ningiwa molwa shike, ngele nda mono uyelele awuhe otandi mu galukile,” ta popi ngaaka.

Kamari ta ti, uyelele mboka e na paife, omboka a mono ashike miikundaneki, onkene ita vulu okuwu koleka.

“Omasiku ga tokolwa kaanilonga ekanka ndika ta li ka kala ko kandi ga shi, ashike ngele uyelele awihe owa thikindje, otandi mu tseyithile,” ta popi ngaaka.

Ta ti, momukokomoko goshiwike shika ota kala a mona uyelele mboka.

Otaku hokololwa kutya aanilonga oyendji yelelo lyondoolopa yaShakati oya hala okuninga ekanka nelalakano lyeindilo opo elelo  ligwendhele oondjambi  dhawo noopelesenta heyali.

Sha ikolela kuuyelele wa gandjwa komunilonga gumwe eshiwike kuKundana, oya hala anuwa okutula mo ekanka oshoka oya ningi ethimbo inaaya gwedhelwa.

“Okwa li twa ningi omahogololo iiwike iyali ya piti, moka konyala aanilonga ayehe yali ya zimine okuninga ekanka omolwa etompelo ndyoka,” ta ti ngaaka.

Ta gwedha po kutya oya nothelwa ko kutya elelo lyondolopa olya zimina egwedhelo lyoopelesenda heyali, ihe uuministeli womayambulepo goondoolopa niitopolwa yokuushayi owa tindi eindilo ndika.

“Ndyoka olyo etompelo tali tu ningitha ekanka,” ta fatulula ngaaka.

Ta ti, oya hala oku gwedhelwa oshoka iinima ayihe tayi gwedhelwa. 

“Inima oyindji oya gwedhelwa, ota tu tsakanitha ngiini oompumbwe dhetu, ngele tse natse ita tu gwedhelwa kiilonga,” ta nyenyeta ngaaka.

– vkaapanda@nepc.com.na