Omukuluntuwiliki muuministeli wuuhaku nonkalonawa Ben Nangombe okwa ti, omilandu oshowo oompango dhoCovid-19 sho dha kuthwa po kepangelo, odha kwatela mo wo nomafumbiko goCovid-19.
Okuza nkene uuyuni wa eta po omalandulathano omape goCovid-19, omahangano gomafumbiko gopaumwene oga kala taga pula oshimaliwa sha gwedhwa po shi li pokati koN$4 000 noN$8 000.
“Omulandu gwa pitithwa kuuministeli wuuhaku nonkalonawa otagu ti, aantu ya sa komukithi goCovid-19, otaya fumbikwa ashike ngaashi aantu ya kala haya fumbikwa, kaape na oshimaliwa sha gwedhwa po,” ta fatulula ngaaka.
Oshifokundaneki shika okwa Ii sha yi muule, okupulapula omahangano haga fumbike aantu ya sa komukithi goCovid-19, sha ikwatelela kwaamboka itaaya vulu okugwanitha oshimawa hashi pulwa komahangano ngoka.
Shika ohashi kala oshidhigu kaapambele yamwe mboka kaaye na iiyemo ya gwana okugwanitha po oshimaliwa shoka shomayakulo goCovid-19.
Kakele koshiketha, emanya nomayakulo ngoka ga kala haga gandjwa ngele omuntu a hulitha koCovid-19, omahangano gomafumbiko gopaumwene ohaga pula oshimailiwa sha gwedhwa po.
Omutoolinkundana nguka sho a li a kongo omauyelele komahangano ga yolooka gokufumbika, oga holola kutya ohaga pula oshimaliwa sha gwedhwa po.
Omayovi ngoka haga pulwa oga ikolelela komimvo dhanakusa, nokesiku lyefumbiko. Ngele efumbiko otali ningwa mokati koshiwike, nena ondando ya gwedha po ohayi kala yi li pevi okuyelakanitha nefumbiko lyomehuliloshiwike.
“Elongekidho lyefumbiko lyomuntu a sa koCovid-19 olyi na ondilo kefumbiko lyomuntu inaa sa koCovid-19, omolwomayakulo ngoka nakusa ha ningilwa,’’ omuniilonga gwehangano limwe ta fatulula ngaaka.
Ta ti, uuna omuntu ha kwata openzela nenge a adha momimvo dhokukwata openzela, oshimaliwa ohashi kala oshishona mwa kwatelwa oshiketha oshowo omayakulo.
Ta gwedha po kutya ngoka ina adha okukwata openzela, omayakulo ngoka ohaga kala ge li pombanda inaamu kwatelwa oshiketha. Ehangano limwe ishewe, nalyo olya fatulula kutya omayakulo gomuntu a sa koCovid-19 oge li pombanda omolwiihauto oshowo aantu mboka haya ka longa pethimbo lyefumbiko, oshoka aapambele ihaya thiki po.
“Ta ti, ondando yoshimaliwa shomuntu inaa sa koCovid-19 oyi li pevi noonkondo. Omayakulo oge na ashike N$1 000, inaamu kwatelwa iiketha nosho tuu,” ya fatulula ngaaka.
Natango ehangano ekwawo okwa li lya gandja uuyelele kutya oshimaliwa shoka hashi futwa uuna gumwe a sa komukithi goCovid-19, osha yooloka noonkondo, noshaangoka inaa sa komukithi goCovid-19.
“Aantu mboka haya ka gandja omayakulo oshowo iihauto mbyoka ya longelwa engambeko lyoCovid-19 oyo hayi gwedhelitha oshimaliwa shoka,” ta fatulula ngaaka. vkaapanda@nepc.com.na