New Era Newspaper

New Era Epaper
Icon Collap
...
Home / Aaselekadhi Aafukedhi Otaya Li Oothigwa Oshipungo

Aaselekadhi Aafukedhi Otaya Li Oothigwa Oshipungo

2006-08-25  Staff Report 2

Aaselekadhi Aafukedhi Otaya Li Oothigwa Oshipungo
"OSHAKATI Aaselekadhi yamwe ohaya tindi okugandja ookopi dhoonzapo dhomaso kaanona mboka ya valwa pondje yokondjokana kaasamane yawo mboka ya mana oondjenda, naashika otashi patele pondje aanona mbaka kaa ya mone omauwanawa gawo guuthiga nomauwanawa galwe. Shampa ashike aaselekadhi ya tokola okukwatwa kombepo yuufukedhi, nena aanona mboka ya valwa pondje yondjokana ohaya patelwa pondje okumona omauwanawa gepangelo oshowo omakwatho galwe. Uupyakadhi mbuka owa hololwa kuNgoloneya gOshitopolwa Oshana, Clemens Kashuupulwa moshipopiwa poshigongiilonga shomasiku gatatu shi nasha nepashulo shEhangano lyOkunkondopaleka Aaselekadhi, Aasilwalume nOothigwa dhaavali ya sa koHIV/AIDS moNamibia (Organisation for the Empowerment of Widows, Widowers and Orphans of HIV/Aids in Namibia) nefufupiko OEWONA. ""Omanga tatu kambadhala mpoka tatu vulu oku ya kwatha (aaselekadhi) opo ya mone shoka ye shi nuninwa, natse otwa tegelela wo ya longele kumwe natse meudhililo opo oothigwa dhi vule okumona oonzapo dhomaso dhaasamane yawo mboka ya sa oshowo omauwanawa ngoka (oothigwa ) dha nuninwa,"" osho Ngoloneya ta yelitha. Mokati kaakuthimbinga poshigongi shoka omwa li oomeme mboka ye li ookansela, aaleli yopamuthigululwakalo, aalongisikola naapangi aakulu, Omukuluntuwiliki gUundjolowele mOshana, Naftali Hamata, aakulukadhi yomalenga omanene naakwaniilwa moNooli. Oomeme mbaka ongaashi meme Cecilia Kauluma Elifas gOmukwaniilwa gwaNdonga, Hertha Munkundi gwaNgandjera, Hilja Nelulu gUukwanyama, Selma Shooya gUukolonkadhi oshowo meme Lydia Iipumbu gUukwambi. Kashuupulwa ngoka a popi peha lyoongoloneya yakwawo gwaMusati, Oshikoto nOhangwena mboka kwa li ye na okukala poshigongi shika, okwiindile aawiliki/ooyene yoshikondo shemona, aanangeshefa yoyene, aantu koohandimwe oshowo aantu ayehe yi imange uukuni kumwe okunengeneka onkalo lyiihuna yaantu mboka taya hupu shokadhila ano mboka ya pumbwa eyambidhidho moshigwana. ""Peha lyoongoloneya yakwetu miitopolwa yomonooli, otandi uvaneke eyambidhidho lyetu melongelokumwe nomalelo getu gopaitopolwa okushilipaleka kutya, pamuhanga, tse otatu kambadhala okuninga po sha okunengeneka iihuna yaantu mboka ya pumbwa ekwatho. Mokugandja eyambidhidho lyeni, atuheni pamwe nOEWONA otatu ka kaleka po ongushu nuuntu womuntu mboka wa kala wa yugwa aaselekadhi, aasilwalume noothigwa dha etidhwa komukithi goHIV/AIDS miitopolwa yetu."" OEWONA, ehangano ndyoka lya totwa po omvula ya za ko muNovomba, oli indile oshigongi shoka shomasiku gatatu pOngwediva opo aakiintu mboka ye na enwethomo ya topolelathane iiyetwapo nokuninga omathaneko nkene shi na okweendwa nawa okuyambidhidha aantu mboka ya pumbwa ekwatho moshigwana. Ehangano ndyoka omutse-yambidhidhi gwalyo omunene e li omukulukadhi gOmupresidende, meme Penexupifo Pohamba, ngoka wo a kala pomutumba ngoka, okwa totha mo gamwe gomomalalakano gehangano oshowo omaupyakadhi gedhengo lyoHIV/AIDS pakuninga omapekapeko goompumbwe dha taalela aaselekadhi/aasilwalume noothigwa. Ehangano ndika ohali wilikwa meyambidhidho nomayele kuMeme Pohamba, iilyo yelelo, aaniilonga mwa kwatelwa omukuluntuwiliki gwalyo, aayiyambi, omahangano gomoshilongo oshowo epangelo lyaNamibia."
2006-08-25  Staff Report 2

Tags: Khomas
Share on social media