New Era Newspaper

New Era Epaper
Icon Collap
...
Home / Ba 34 balifiswa hala kuloba mulao wakukwalwa

Ba 34 balifiswa hala kuloba mulao wakukwalwa

2020-04-06  Selma Ikela

Ba 34 balifiswa hala kuloba mulao wakukwalwa

Selma Ikela

WINDOKO – Babanyazwa bamashumi amalalu kababane nebakile balifiswa masheleñi amwahala N$2000 ni N$4000 ki mapokola kabaka la kulekisa bucwala kasamulaho akupatalazwa kwa nako yaputako yanaha, ili yene hanisize tekiso yabucwala mwanako yeo. Mwanako yakukwala, lintolo kaufela zelekisa bucwala halisika lumelelwa kulekisa, kakuli bucwala bungiwa kuli buwela mwalika zesali zabutokwa hahulu sina lico, milyani nikubateñi kwamezi. Mulao wanako yaputako wakakokwani ka Corona (Covid - 19) wabu 11 ubulela kuli bucwala habuna kulekiswa mi mutu yaloba mulao wo, ukona kulifiswa masheleñi alikana N$2000 kapa kubeiwa mwatolongo kanako yesa fiteleli likweli zesilezi, kapa kulifiswa nikubeiwa mwatolongo kanako yeswana.  Sibuabui wasipokola Kauna Shikwambi naize babanyazwa bamashumi amabeli ka alimuñwi (21) nebalifisizwe mwasikiliti sa Zambezi kabaka la kuloba mulao wabu 11 wanako yaputako yanaha. Babeleki bamwamanwelo abucwala bababeli nebatamilwe kabaka la kukwalula manwelo abucwala. Mwasikiliti sa Ohangwena, nekulifisizwe babane mi nekutamilwe balekisi babucwala bababeli. Mwasikiliti sa Omusati kwamunzi wa Oshikushashipya batu babalikana 350 nebafumanwi bakubukani kakukulubelwa kuli nebalapela fasibaka sa maino. Shikwambi naize nebafilwe lituto hala butata bwa cwale mi nebakile bakauhanywa. Mwalikiliti za Oshana, Khomas, //Kharas, Omusati ni Otjozondjupa mutu alimuñwi kokuñwi ni kokuñwi natamilwe hala kuloba mulao oswana. Batu bababeli nebalifisizwe N$2000 yomuñwi ni yomuñwi hala kuloba mulao oswana. 
Mwasikiliti sa Erongo yanyazwa nakile alifiswa N$4000 hala kuloba mulao oswana nikulekisa asina liñolo leli mulumelela kueza cwalo. Shikwambi naize hakuna lipiho zene bihilwe mwalikiliti za Kavango, hamohocwalo nimwa likiliti za Hardap, Omaheke, ni Oshikoto. Nabulezi hape kuli sicaba nesifilwe mamela hala kubuluka mulao.  “Nombolo hala batu babalongwa neli hande, konji limotikala zeñwi zenyinyani. Mi sicaba sielezwa kuli basike kukwela mwalimotikala zelongile batu babafitelela babalalu. Mi bakwaezi bana nikufiwa lituto hala kozi yetiswa kikakokwani ka Corona,” nekubulezi Shikwambi. Nabulezi hape kuli kukwala lipisinisi zeñwi kusali tata, mi naize mwendi kikalibaka la lipiho zabuhata zesweli kufiwa. 


2020-04-06  Selma Ikela

Tags: Khomas
Share on social media