Home / Babanyazwa kabukwenuheli balibelela katulo ya Khuta Yetuna Babanyazwa kabukwenuheli balibelela katulo ya Khuta Yetuna
Roland Routh WINDHOEK – Batu balobapeli baba satalimani nimulatu wabukwenuheli, kubulaya, kubata kubulaya, kubata kupuma sikiliti, kutisa mifilifili, nikuleka litobolo isi kamulao, basalibelezi kana Khuta Yetuna ika utwa buipizezo bwabona bwakuli Khuta yanaha Namibia haiswaneli kuba zekisa. Progress Kenyoka Munuma, walilimo ze 57, Shine Samulandela, 52, Manuel Manepelo Makendano, 66, Alex Sinjabata, 55, Diamond Samunzala Salufu, 58, Hoster Simasiku Ntombo, 55, Fredrick Isaka Ntambila, 54, ni John Mazila Tembwe walilimo ze 51, nebaluzize pizo yabona yeketahani yene batisize kuli Khuta Yepahami haikoni kubazekisa kakuli babulela kuli Mutayi wa Caprivi, ose uzibahala kasikiliti sa Zambezi neisi kalulo yanaha Namibia kuzwa sapili. Muatuli swalelele mwa Khuta Yepahami Petrus Unengu nahanile maikuto abona mwa Lungu silimo se, mi muyemeli wabona yalifwa kimuuso, Illse Aggenbach nañolezi Muatuli Yomuhulu kuli atalime sinca katulo. Litaba zakubata kutalima sinca katulo libile zeñata kuzwa silimo sa 2007, ili fo yo neli Muatuli Swalelele nyandi John Manyarara nabalengile mwasitokisi kalilimo zemwahala 30 ni 32. Lilimo zene bafilwe neli beezwi kwatuko ki Khuta Yetuna haba kupa kuli taba yobona italimwe hape, mi muzeko wabona nokalile sinca fapila muatuli yomunca mwa Sikulu 2013. Babanyazwa balobapeli nebatamilwe mwahala Sikulu 2002 ni Ñulule 2003 mi sebali mwatolongo lilimo ze 15. Ku akalezwa kuli nebabile nikabelo mwakukwenuhela naha nikubata kupuma sikiliti sene sizibahala ka Caprivi kwanaha Namibia mwahala Muimunene 1998 ni Ñulule 2003. Mwakatulo Yahae Unengu nasupile kuli kitaba yezibahala kuli babanyazwa nebakupile mi bana nimampampili anaha Namibia. Mi hape bana nimampampili akubota anaha Namibia, ili kusupeza kuli kibayahi ba Namibia. Kono nebaize nebaezize cwalo kuli bana babona bakene likolo, nikuli bakone ku asebalisa kwakubuluka mali kwa lipanka. Munumu nibanyazwa nibona babulela kuli Zambezi nesi kalulo ya South West Africa yene zamaiswa ki Germany, kacwalo naha hailukuluha kasilimo sa 1990 neisi kalulo yateñi. Unengu naize Phil ya Nangolo yana bizizwe kimuyemuli kuli kipaki yaziba hande lika, napalezwi kufa hande bupaki koifita miseto yanaha Namibia. “Ikona kuba kuli kicaziba mwalitaba zeñwi kono mwalitaba zamiseto ya South West Africa yeli Namibia kanako yacwale halizibi,” nekubulezi Unengu. Muyemeli wa muuso Laurens Campher naize balobapeli nebabata feela kulyehisa muzeko. Naize nekupalile kale hane babata kuli khuta isike yabazekisa, mi khuta nebulezi kale kuli Zambezi kikalulo ya Namibia, muzeko no isizwe la 30 Sikulu, kuli Muatuli Yomuhulu atofa katulo yahae.
Your experience on this site will be improved by allowing cookies.
